Cette édition numérique du manuscrit Ms. 522 de Chantilly a été créée dans le cadre du projet Cité des Dames, créatrices dans la cité de l’I-Site Future porté par l’université Gustave Eiffel.
Ayant perdu de laueuglé vaincueur
Non ſeullement le ſentement du cueur.
Mais de ſon nom, dictz et faictz la memoire.
Ayant perdu le pouuoir et la gloire
Et le plaiſir de la doulce eſcripture
Ou tant ie fuz incline de nature
Me trouuant ſeulle en vng lieu ſi plaiſant
Que le hault ciel ſe rendoit complaiſant
Par ſa doulceur, et par ſa temperance,
A la verdeur du prè plein deſperance,
Enuironnè de ſes courtines vertes
Ou mille fleurs a faces deſcouuertes
Leurs grandz beaultez deſcouuroient au ſoleil
Qui ſe couchant alheure eſtoit vermeil,
Et laiſſoit lair ſans chault, ny froid, ſi doulx
Que ie ne ſcay cueur ſi plein de courroux
De ire, et dennuy, qui neuſt eu guariſon
En vng tel lieu, fors moy qui ſans raiſon
Fuyant les gens me retiray a part
Pour nauoir plus a leur paſſetemps part.
Car cueur qui na de plaiſir vne goutte
Den veoir ailleurs il a peine ſans doubte.
Par vne ſente ou lherbe eſtoit plus baſſe
Me deſrobay comme femme non laſſe
Haſtiuement, pour neſtre point ſuyuie
Car de parler a nul nauoye enuie.
En mon chemin ie trouuay vng bon homme
La m’arreſtay, en luy demandant comme
Lannee eſtoit, et quil en eſperoit,
Quil auoit faict, quil faiſoit, quil feroit
De ſa maiſon, femme, enfans, et meſnage
De ſon repos, et de ſon labourage
Prenant trop plus de plaiſir a louyr
Quen ce que plus me ſoulloit reſiouyr.
Ainſi parlant penſant toute ſeulle eſtre
Ie veis de loing troys dames appareſtre
Saillans dun boys hault, fœillu, et eſpais
Dont vng ruyſſeau treſcler pour mettre paix
Entre le boys et le prè ſe mectoit.
Portant le noir et lune et lautre eſtoit
D’une grandeur Colletz touretz cornettes
Couuroient leurs colz leurs viſaiges et teſtes.
Leurs yeulx ie vey vers la terre baiſſez
Et de leurs cueurs par trop d’ennuy preſſez
Sailloit ſouſpirs, dont tout lair raiſonnoit
Mais vng ſeul mot leur bouche ne ſonnoit.
Leur marcher lent monſtroit bien que triſteſſe
Rendoit leurs piedz agrauez de foibleſſe.
Lors quant ie vey vng ſi piteux obiect
Penſè en moy que ceſtoit vng ſubiect
Digne dauoir vng Alain charretier
Pour les ſeruir comme elles ont meſtier.
Car moy qui ay trop grande experience
Pouoys treſbien iuger ſoubz patience
Leur paſſion treſextreme eſtre cloſe,
Jay mainteſfoys ſouſtenu telle choſe,
Qui me feiſt lors deſirer de ſcauoir
Si pis que moy elles pouoient auoir.
En ce deſir vers moy les vey venir
Touſiours leurs yeulx contre terre tenir
Que iapperceu quant furent pres de moy
Iecter ruyſſeaulx dont ne puys ny ne doy
La verite trop eſtrange celer,
Car ie les vey comme vng fleuue couller.
Ie feis du bruyt dont elles maduiſerent
Et lune a lautre vng petit deuiſerent,
En eſſuyant leurs yeulx ſecretement
Vindrent vers moy, me diſans doulcement.
IL vous ſeroit Madame mieulx duiſant
Parler a nous qu’a ce faſcheux paiſant.
Mais quant ie vey deſcouuers leurs viſages
Auſquelz nature auoit faict telz ouurages
Qu’a leurs beaultez nulle aultre napprochoit
Il me ſembla que nature pechoit
Dauoir laiſſe amortir leur couleur
Car ie ignoroys encores leur douleur.
Je congneu lors que ceſtoient les troys dames
Que plus iaymois, de qui dieu corps et ames
Auoit rempliz de vertuz de ſcauoir
Damour dhonneur autant quen peult auoir
Nul corps mortel, de bonte et de grace.
Mais de beaulte lune lautre ne paſſe
Ny de facon parolle et contenance.
Leur trinite ſans nulle difference
Demonſtroit bien par lunion des corps
Qu’amour leurs cueurs vniſt par doulx accords.
Croyez pour vray que pitie et deſir
De ſoulaiger leur couuert deſplaiſir
Me contraignit leur dire en ſoupirant
Vng mal cachè va touſiours empirant
Et ſil eſt tel quil ne puiſſe eſtre pire
Il ſamoindriſt quelque foys a le dire.
Moy donc jugeant par trop apparens ſignes
Que vous portez le mal dont neſtes dignes,
Je vous requier par lamour qui commande
Sur tous bons cœurs, octroyez ma demande
Et dictes moy la douleur et la peine
Que vous ſouffrez, dont chacune eſt ſi pleine
Que ſans mourir ne la pouez porter.
Si ie ne puis au moins vous conforter
Je ſouffriray par grant compaſſion
Auecques vous la tribulation.
Vous eſtes troys, il vault mieulx eſtre quatre
Et nous aller dedans ce prè eſbatre.
Et ne craignez priueement parler
Car comme vous ie promectz le celer.
Las ce neſt pas par doubte de ſecret
Que nous craignons compter noſtre regret,
Lequel vouldrions eſtre par vous eſcript
Mais nous voyons maintenant voſtre eſprit
Si pareſſeux, ſi faſchè, ou laſſè
Que ce neſt plus celuy du temps paſſè.
Qui nous faict peur que la peine dentendre
Noſtre malheur reffuſeriez de prendre.
Dames pour dieu nattribuez a vice
Si iay laiſſe long temps a ceſt office,
Penſant pour vray quamour nauoit obmis
Vng ſeul des tours quil faict en ſes amys
Qu’en mes eſcriptz paſſez ne ſoit trouuè
Et de mon temps veu, ouy, ou prouuè.
Et ſi leur dis ie reprendray la plume
Et feray mieulx que ie n’ay de couſtume
Si le ſubiect me voullez deſcouurir.
Ainſi diſant vei leurs doulx yeulx couurir
Dune nuee de larmes dont la preſſe
Les feiſt ſortir par pluye trop eſpeſſe.
Me regardans me prindrent pour aller
Dedans le prè, ou long temps ſans parler
Allaſmes loing. Et lors leur prins a dire
Si ne parlez, ie n’ay garde deſcrire.
Pour dieu tournez le pleur qui vous affolle
A deſcharger voſtre ennuy par parolle.
Lune me creut, Non la moins vertueuſe
Ny ennuyee, Et diſt a voix piteuſe
O Vous amans, ſi pitie iamais euſt
Sur vous pouuoir de conuertir en larmes
Voz triſtes yeulx, Si iamais douleur peult
Bruſler voz cœurs, par ſes cruelz alarmes.
Et ſi iamais amour voz langues feiſt
Fondre diſant piteux et triſtes termes ?
¶ Oyez le plainct du cueur non deſconfit
Mais en mourant touſiours preſt de porter
Ce que luy donne amour qui luy ſuffiſt.
Nous ſommes troys dont le reconforter
Impoſſible eſt, car ſans noſtre amytie
Sans mort tel mal ne ſcaurions ſupporter.
¶ Lune de lautre a egale pitie,
Egale amour egale fantaiſie,
Tant que lune eſt de lautre la moyctie.
Entre nous troys ny eut onc ialouzie
Oncques courroux oncques diuerſite
Si lune a mal, laultre en eſt toſt ſayſie.
¶ Du bien auſſi de la fœlicite
Lune nen a que lautre ny ait part,
Pareillement part en laduerſite.
Mort pourra bien des corps faire depart,
Mais nul malheur naura iamais puiſſance
De mectre vng cueur des deux autres apart.
Or euſmes nous toutes troys ioyſſance
Du plus grant bien qui peult damour venir,
Sans faire en riens a noſtre honneur offence,
Helas que dur men eſt le ſouuenir
En me voyant aduenir le contraire
Du bien treſſeur que ie penſoys tenir.
¶ O ſainct amour, pour noz troys cœurs attraire
Tu leur donnas la fin de leur deſir
Que tu leur viens hors de ſaiſon ſubſtraire.
Troys ſeruiteurs telz que lon doit choyſir
Euſmes par toy, dont la perfection
Vng paradis nous eſtoit le plaiſir.
¶ Beaulte, bonte, treſforte affection
Treſferme amour, bon ſens, bonne parolle
Ceſtoit le pis de leur condition.
Leur amytie neſtoit legiere ou folle,
Leur grace eſtoit ſaige, doulce, aſſeuree
Et de vertu pouoyent tenir eſcole.
Par leur amour grande et deſmeſuree
Noz cœurs aux leurs rendirent ſi vnis
Que la douleur nous en eſt demouree.
Car dun tel heur furent ſi bien garnis
Quilz neuſſent ſceu iamais ſouhaitter mieulx
Las ilz en ſont maintenant bien punis.
¶ Sur tous le mien malheureux ennuyeux
Qui ſent treſbien le cœur de ſon amy
Tout different du parler, et des yeulx.
O trop cruel, et mortel ennemy
Qui veois mon cueur languir de telle ſorte
Que ne mectz tu ton eſpee parmy ?
¶ En maſſeurant qu’a vne autre amour porte
Et que de moy plus il ne te ſouuient
Bien toſt ſeroye ou conſolee ou morte,
Mais ie ne ſcay quel malheur te retient
De men celer ainſi la verite
Ou ſi a toy, ou ſi a moy il tient.
A moy las non, amour et charite
Ont bien garde mon cœur de toffenſer
Comme toy moy, ſans lauoir merite.
Ie ne ſceu onc nulle choſe penſer
Que pour ton bien et honneur ſe peuſt faire
Ou lon ne m’ait ſoubdain veue aduancer.
¶ Iay bien voullu mon ferme cours parfaire
Et te monſtrer qu’amour leale et bonne
Tu ne ſcaurois par ta faulte deffaire.
De ton coſte, O trop faincte perſonne
Ie ne ſcay riens, dont te puiſſe arguer
Fors que ton cœur au mien plus mot ne ſonne.
¶ De ton parler ie ne voy riens muer
Tu dis m’aymer ainſi qu’as de couſtume
Mais par mentir, ie croy me veulx tuer,
Car en t’aymant ma vie ie conſume
Et en ſentant que tu ne m’aymes point
Mon cœur ſe faict de patience enclume.
¶ Il eſt au tien ainſi comme il fut ioinct
Et le tien non bien qu’en mentant tu dis
Quil eſt tout mien, et dieu le te pardoint.
Queſt deuenu le regard de iadis
Qui meſſager eſtoit de ton fainct cœur ?
A qui du mien iamais ne contredis,
¶ Et le parler qui par doulce liqueur
Le rendoit mol et foible a ſe deffendre ?
Dont toy amy demouroys le vaincueur.
Tu dis m’aymer, mais qui le peult entendre ?
Quant tous les tours, et les ſignes damour
En toy voy mors, et conuertiz en cendre.
¶ O malheureux pour moy ce premier iour
Ou ie cuidoys mon heur prendre naiſſance
Et pour iamais faire en moy ſon ſeiour.
Or ne voy plus en toy forme ne eſſence
De ceſte amour que ie cuidoye ſi ferme
Ie nen ay plus tant ſoit peu congnoiſſance.
¶ Iay bien doubtè ſouuent ie le t’afferme
Qu’en autre lieu euſſes ton amour miſe
Qui t’euſt mis hors de ceſt honneſte terme.
La verite diligentement quiſe
Iay ſans ceſſer, et trouuè pour certain
Que tu ne las encor en nulle aſſiſe.
¶ Queſſe de toy, sera ton amour vain ?
Ou bien eſt il de toy du tout ſailly ?
Dictz le moy franc, et me baille la main
En me quictant, ſans que i’aye failly
La foy promiſe, et de moy bien gardee
Et non de toy, vaincu, non aſſailly.
¶ Aſſez tu mas hantee et regardee
Mais en nul cas qui ſceuſt ou peuſt deſplaire
A vng amy, ne mas veue hazardee.
Or ne ſcay ie malheureuſe que faire
Puis que de toy vng mot ne puis tirer
De verite, qui me peult ſatiſfaire.
¶ Ie te voy triſte, et ſouuent ſouppirer.
Crainte me dit que ce neſt pas pour moy
Que ainſi te voy par douleur martyrer,
Amour me dit que ſi, et que ſa loy
Permect telz cas, pour mieulx faire la preuue
De ma treſferme et trop leale foy.
¶ Crainte veult bien que vng autre amy ie treuue
Pour ne mourir en ce cruel tourment
Amour deffend que ie face amour neufue.
Helas mon cueur quel eſt ton ſentement
Es tu de luy aymè, ou ſi aymer
Vng autre doibz, diz le moy franchement,
¶ Aymè ne ſuis qui meſt cas trop amer
Car ie le ſens malgre ſon apparence
O fainct amy que tu es a blaſmer.
Aymer ne puis, ie n’ay pas la puiſſance
Car long temps a qu’en luy mis mon voulloir
Et en perdy du tout la ioyſſance.
¶ Las cœur qui nas dun autre aymer pouuoir
Et deſtre aymè as perdu le plaiſir
Tu nas pas tort de te plaindre et douloir.
Regarde amy ſi tu as le loyſir
Sil eſt tourment qui ſoit au mien ſemblable
N’ayant nul bien, ny de nul bien deſir.
¶ Ie n’ay nul bien te congnoiſſant muable
Ny ie nen veulx, craignant de rencontrer
Amy, de toy moins parfaict, variable.
Dauſſi parfaict lon ne men peult monſtrer
Quant à beaulte, vertu, et bonne grace
Sur qui ny ait nul vice à remonſtrer.
¶ Et qu’un qui fuſt moindre que toy iaymaſſe
Plus toſt mourroys que de my conſentir,
Point ne mectray mon amytié ſi baſſe.
Ie ne me puis et me veulx repentir
De ceſte amour, fermetè la tient forte,
Mais la douleur la veult aneantir.
¶ Fut il iamais malheur de telle ſorte ?
Iayme vng amy qui dit m’aymer, mais quoy ?
Ie voy et ſcay qu’amour eſt en luy morte.
Laiſſer le doy, car clerement ie voy
Quil eſt menteur. Mais mon amour honneſte
Ne me permect faire ce que ie doy.
¶ Et tant que d’œil, bouche, pied, main, ou teſte,
Signe damour verray, rompre ne veulx
Ceſte amytie priſe a ſa grant requeſte.
Si fermes ſont les lyens et les nœudz
Que ſi rompuz ilz ſont de ſon couſtè
Ilz ſont du mien encor entiers et neufz.
Dames croyez quil ma bien cher couſtè
Ce faulx amy, et couſte, et couſtera
Tant qu’a la mort cœur, et corps ſoit bouttè.
La ſeulle mort de mon cœur ouſtera
Lamour de luy, qui ſans luy me demeure
Car autre amour mon cœur ne gouſtera.
¶ Et qui pis eſt vng autre ennuy ſur lheure
Meſt ſuruenu, qui le premier augmente
Dont ie ne ſuis pas ſeulle qui en pleure.
Le ſeruiteur de ceſte vraye amante,
Qui tant long temps la aymée et ſeruie
Quel’en eſtoit treſheureuſe et contente,
¶ Enfin a eu de la laiſſer enuie.
Dont de lennuy quel’en prend et a pris
Iay bien grant peur quel’abrege ſa vie.
Il luy a dit eſtant delle repris
Et bien inquis de ſa mutation
Quil eſt ainſi de mon amour eſpris.
Moy qui ſcauoys ſa grande affection
Et deuant qui faillir a ſa maiſtreſſe
Euſt crainct, de peur de ma correction.
Seroys ie bien ſi meſchante et traiſtreſſe
Le receuoir ? voyant quil faict mourir
Par ſon peche ma compaigne en triſteſſe ?
¶ Iaymeroye mieulx par mort me veoir perir
Qu’en la voyant porter ſi grant torment
Ie feiſſe riens pour ceſte amour nourrir.
En ſa faueur ie laiſſe entierement
Veoir, et parler, ou ſe puiſſe atacher
Lœil, et le cueur, d’un ſi meſchant amant.
¶ Ie laimoye tant, et le tenoye ſi cher
Quant il laymoit, comme sil m’euſt aymee,
Mais maintenant ne le veulx approcher.
Samye eſtoit digne deſtre eſtimee
Il deuoit bien pour iamais si tenir,
Et elle auſſi daymer neſtoit blaſmee.
Dames, celuy qui veult mien deuenir
Ie nen veulx point, et ſon amour me fache,
Lautre que iayme ie ne puis retenir.
Lun eſt meſchant, trop variable et laſche
Lequel me ſuyt, et touſiours ie le fuys
Samye et moy auons trop ferme atache.
¶ Celuy me fuyt que iayme et que ie ſuys
Ie l’ay perdu et ſi ne le puis croyre,
Helas iugez en quel trauail ie ſuis.
Ie nay plus rien ſinon que la memoire
Du bien paſſé qui entretient mon dueil
Ie croy que nul na veu pareille hyſtoire.
Or faictes donc madame le recueil
De mes douleurs, que nay voullu celer
Taire me fault ayant la lerme a l œil,
Car les ſouppirs empeſchent le parler.
LEs yeulx leuez au ciel creuez de pleurs
Iectans torrens, dont arrouſoit les fleurs
Donna ſilence a ſa bouche vermeille.
Car la douleur qui ſembloit nompareille
Faiſoit ſa voix par ſouppirs eſtoupper
Tant quil fallut deſtacher et coupper
Ses veſtemens pour ſoulaiger ſon cueur
Ou elle fuſt creuee de douleur.
Au bout dun temps que nous leuſmes tenue
Deſſus le prè, elle fut reuenue,
Et ſi me diſt telle eſt ma maladie
Que qui a pis ſouffert que moy le dye.
Lors ſe coucha pres de moy morte et bleſme
Les autres deux feirent auſſi de meſme
Car vng chacun de leurs doulx cueurs ſentoit
Lennuy trop grant que la tierce portoit.
Moy qui dun mal en veoye troys pleurer
Dys, vous pourriez iuſque au ſoir demeurer
En ce plourer, que ne pouez finer.
Et ne ſcauriez me faire deuiner
Qui de vous troys ſeuffre plus de martyre
Si ne voullez le me dire ou eſcripre.
Voyant du lict le ſoleil approcher
Vint la ſeconde ma main prendre et toucher
Et me prier ne m’ennuyer d’attendre
Quelle me peuſt au long ſon compte rendre.
IE ſens diſt elle
Cent et cent foys douleur aſpre et mortelle
Plus que ne faict point ne fault que le cele
Nulle des deux
Car le cruel lequel nommer ne veulx
Amy, qui ha damour rompu les vœux
Certes neſt digne,
Qu’a luy ie parle, ou que luy face ſigne,
Ny de plaiſir ny de colere mine.
Den dire mal,
De lappeller traiſtre, faulx, deſloyal,
Et plus cruel que nul autre animal,
Ce ſeroit peu.
Pour amoindrir de mon courroux le feu
Iayme bien mieulx laiſſer iouer ce ieu
A la premiere.
Qui de luy dire iniure eſt couſtumiere
Elle luy eſt ainſi que vne lumiere
Deuant ſes yeulx.
Son cueur changeant trop fainct et vicieux,
Elle congnoiſt, et ſi luy ſiet bien mieulx
De le blaſmer,
Que non a moy, car de deſeſtimer
Celuy que tant lon a voullu aymer
Neſt pas bien faict.
Sil eſt meſchant, variable, imparfaict,
Delle le voy ſi treſmal ſatisfaict
Si deſdaigne,
Si reffuzè, deſpriſé, eſloignè,
Quil a treſmal en ce cas beſoignè
Daller a elle.
Pas ne penſoit la trouuer ſi cruelle
Elle le hait bien fort, et ne luy cele
Ces faſcheux tours.
Elle le fuyt en tous lieux et touſiours.
Or a il bien maintenant le rebours
De ſon attente.
Mais de ſon mal ie ſuis ſi mal contente
Et en ſoubſtiens douleur ſi vehemente
Que plus nen puis.
Ie ſuis quaſi deſſus le bord de lhuys
De deſeſpoir, Et ne crains profond puitz
Ny haulte tour,
Ou voluntiers ſans eſpoir de retour
Ne me iectaſſe, pour deffaire lamour,
La paction,
Le ſouuenir, memoire, affection,
Qui de mon mal ſont generation
Si importable.
Et qui pis eſt ſi irremediable
Qu’a ma doulleur nen eſt nulle ſemblable.
Ie lay aymè
De ſi bon cueur, tant creu, tant eſtimè
Que cueur et corps eſtoit tout abiſmè
En lamytie
Que luy portoys, Encor ay ie pitie
Dainſi le veoir puny et chaſtyè
De ſon pechè.
Helas mon dieu comment ſeſt il faſchè
De mon amour, et ainſi detachè,
Oncques offence
Ie ne luy feis, fors que la reſiſtence
Pour quelque temps, ou il feiſt telle inſtance
Et ſi honneſte,
Qu’auec honneur ie pouuoys ſa requeſte
Bien accorder. Et puis par longue queſte,
Par long ſeruice,
Par forte amour qui faiſoit ſon office
Gaigna mon cueur, voyant le ſien ſans vice.
O la victoire.
Dont le vaincu receuoit telle gloire
Que le vaincueur helas, qui euſt peu croire
Qu’elle euſt duré
Si peu de temps, ny que i’euſſe enduré
Si longuement mal ſi deſmeſuré
Sans ſouffrir mort.
Helas iugez, meſdames, ſi ſon tort
N’eſt pas egal à l’amour qui trop fort
Mon cueur tormente,
Et ſi autant ne ſuis leale amante
Comme il eſt faulx, dont, ſi ie me lamente,
I’ay bien raiſon.
En me cuidant tromper par trahyſon,
Luy meſme a beu ceſte amere poyſon
Qui tant le bleſſe.
Il eſt puny par beaulté et rudeſſe,
Mais ſon ennuy n’amoindriſt ma triſteſſe,
Car ſon cueur laſche
Mennuye fort et me deſplaiſt quil faſche
A celle là qui ne peult auoir tache
D’auoir permis
Quil la ſeruiſt, ailleurs ſon cueur a mis
Lequel ne peult endurer deux amys,
Ien ſuis bien ſeure.
Son deſplaiſir auec le mien ie pleure,
En la cherchant il la faſche à toute heure,
Mais plus à moy
En me laiſſant, dont ſuis en tel eſmoy,
En tel ennuy, où nulle fin ne voy,
Qu’à bien grant peine
Se peult penſer la douleur qui me meine
Ie me contrainctz, et rys, et foys la ſaine
Et ie me meurs.
Ces dames cy qui congnoiſſent mes mœurs
Scaiuent quelz maulx, foibleſſes, et douleurs
Ie diſſimule.
Dont au dedans le double en accumulle
Par deſeſpoir qui ſans fin me ſtimule
De me donner
Du tout à luy. Mais peur d’abandonner
Ces deux me vient ſi treffort eſtonner
Que mieulx veulx viure
En ce tourment, ſans en eſtre deliure,
Que leurs deux cueurs à tel ennuy ie liure.
Pour elles vis,
Et viure veulx du tout à leur deuis,
Et pour moy non ; Parquoy il m’eſt aduiſ
Que pis que morte
Chaſcun me peult tenir en ceſte ſorte,
Puis que la mort, qui ſeulle me conforte,
Ie veulx fouyr.
C’eſt tout mon bien, mais ie nen veulx ioyr
Que leurs deux corps ie ne voye enfouyr
Auecques moy en noyre ſepulture.
Noz troys malheurs me feront reſiouyr
Deſtre aſſemblez ſoubz vne couuerture.
LOrs vng deſpit et courroux nompareil
Feirent ſoubdain ſon viſaige vermeil
Et la doulleur ſa parolle couppa
Tant qu’a peu près elle ne ſincopa,
Car par troys foys ie la vey deffaillir
Sans que des yeulx il peuſt larmes ſaillir.
Le cueur ſerré iecta ſi piteux crys
Que à les monſtrer deffaillent mes eſcrips.
Mais en voyant la tierce que la place
Luy demouroit, me diſt de bonne grace :
Madame, autant que douleur les tormente,
Souffrans lennuy de leurs ingratz amys,
L’amour parfaict qui dans mon cueur seſt mis
Faict qu’i n’ont mal qu’ainſi qu’elles ne ſente.
¶ Car mon voulloir au leur eſt ſi vny
Que ſi leurs cueurs ont peine pour aymer
Ceulx que l’on peult cruelz amys nommer,
Le mien en eſt comme les leur puny.
¶ Comm’elles iay creu leurs amys loyaux,
Leſquelz i’aimoys comme le propre mien,
Participant en leur plaiſir et bien
Comme ie veulx auoir part en leurs maulx.
¶ Si iay eu part en leur felicité,
Où ſi bien fut noſtre vnion gardée,
Seroit donc bien maintenant retardée
Ceſte vnion pour leur neceſſité ?
¶ Non, Mais courir veulx auſſi vyſte qu’elles
A leur malheur, ſans iamais departir,
Iuſques à ce que lame pour partir
Aura repris ſes aelles immortelles.
¶ Peine, torment, voire dix mille mortz
Ne me feront peur de men tenir près.
Si mort les prend, pourroys ie viure après,
Sentant mourir les deux partz de mon corps ?
¶ Si iauoye mal et les deux euſſent bien,
Il ſuffiroit pour me reconforter,
Car leur amour pourroit mon mal oſter
Contre vne deux ont grant force et moyen.
¶ Si mon ennuy perdoye pour leur plaiſir,
Pour leur ennuy perdre ie doy auſſi
Tout mon plaiſir, ſans point auoir mercy
De cueur, de corps, damour ny de deſir.
¶ Or ie le veulx, et ainſi le concluz
Puys que ie voy leur mal intollerable,
Ie veulx le mien faire irremediable
Et que de moy tout plaiſir ſoit forcluz.
¶ Pleines d’ennuys ſont, que porter leur fault
Non pas pour moy, mais contre leur voulloir,
Moy de plaiſir, auquel, pour mon deuoir,
Hors de mon cueur ie foys faire le ſault.
Madame, helas, penſez l’extremité
La ou ie ſuis ayez pitié de moy.
Voyez mon mal, mon trouble, mon eſmoy,
Voyez amour par amour lymitè.
¶ Lamour des deux me dict O meſchant cueur,
Vous vouldriez vous tant a plaiſir donner
Et ces dames ainſi abandonner
En leur malheur pour vng ſeul ſeruiteur ?
¶ Las, rirez vous quant elles ploureront ?
Et a plaiſir tiendrez les yeulx ouuers
Quant de douleur verrez les leur couuers
En regretant leur amour qui ſe rompt ?
¶ Iouyrez vous du veoir et du parler
De voſtre amy par grant eſioyſſance
Quant elles n’ont d’un tel bien ioyſſance ?
Les laiſrez vous ? Ne le vueillez celer.
¶ Daultre coſte Lamour du plus loyal,
Du plus parfaict qui ſoit deſſus la terre,
Me vient mener vne cruelle guerre
En me diſant, penſez au plus grant mal.
¶ Vous ſcauez bien qu’en laiſſant voſtre amy,
Duquel ſi bien auez eſté ſeruie,
Vous luy oſtez ſoubdainement la vie
Car ſon cueur eſt du voſtre le demy.
¶ Que fera il ſe voyant ſeparè
De ſa moytié ? Croyez qu’il ne peult viure,
Sera chacun des cueurs delles deliure
De leur ennuy le voyant eſgare ?
¶ Si voſtre mort leur apportoit ſecours
Droict à la mort il vous fauldroit courir,
Mais vng amy loyal faire mourir
Sans leur ſeruir ? Ceſt eſtrange diſcours.
¶ Las, quel amy eſt ce que vous laiſſez ?
Vous n’en ſcauez au monde vng plus parfaict,
Et nul bien nont les deux en ce beau faict
Fors que leur mal par le voſtre oppreſſez.
Voyla comment les deux amours enſemble
Me combattent en grant confuſion,
Si m’y fault il mectre concluſion
Ie la diray bien que le cueur m’en tremble :
¶ Puis que leur mal eſt ma mort et leurs vies
Ma vie auſſi, ſi iay receu plaiſir
De leurs plaiſirs, Ie n’ay moindre deſir
Qu’en leurs malheurs de moy ſoyent ſuyuies.
¶ Or ont perdu, ſans ſcauoir bien pourquoy,
Leurs deux amys, ſoit par faulte ou malheur,
Mais moy ie perdz, ſans raiſon ny couleur,
Celuy qui na iamais faulcè ſa foy.
¶ Sa loyaulté eſt vrayement nompareille
Il n’a rien faict qui iamais me deſpleuſt,
Sa grand amour que chacun chercher deuſt
Ie laiſſe et fuys : Neſt ce pas grant merueille ?
¶ Ie le tiens tel, ſi parfaict et ſi bon,
Que ie vouldroys le mectre en troys parties
Et ſi ſerions toutes troys bien parties
Quant des deux pars ie leur feroys le don.
¶ Lhonneſte amour de parler et de veoir,
Là où l’honneur trouue contentement,
Se peult partir quant voluntairement
Le bien on laiſſe où l’on a tout pouuoir.
¶ Iay le pouuoir de bien les contenter
De chaſque iour les deux pars ie leur donne
Et mon plaiſir toutesfoys n’abandonne
Car par le leur il pourra augmenter.
¶ Car en ſentant de chacune deulx layſe
I’en auray plus que ie n’ay de la mienne,
Et mon amy auſſi aura la ſienne
Ne faiſant riens qui bien fort ne me plaiſe.
¶ Mon amy ſeul, qui en vault plus de troys
Sera des troys amy. Ô quel lien
Qui quatre cueurs vnira ſans moyen
En vng voulloir ! Helas, ie le vouldroys.
¶ Mais iay grant peur que por ces deux follaſtres
Qui ſont payez trop d’une larme dœil,
Vueillent plus toſt ainſi mourir de dueil
Que dauoir mieulx, tant ſont opiniaſtres
¶ Puis quelles nont cure dun tel party,
Mon cueur au leur eſt vny ſi tresfort
Que ſans auoir regard a peine ou mort,
De mon amy il ſera departy.
¶ Las quil eſt dur ce mot à pronuncer
Laiſſer ainſi mon bien, mon heur, ma vie
Helas, amy, a la mort te conuie
Lors quon t’ira ceſt adieu annuncer.
¶ Que diras tu, amy, de ton amye
Ou que lamour luy a trop cher couſtè,
Ou tu pourras iuger dautre coſtè
Quelle te hayt, la nommant ennemye.
¶ Amour me mect en vng merueilleux trouble,
Qui d’un coſtè loue ma fermetè
Et d’autre part deffaict de ſeureté
Le vray lyen qui rendoit vng, vng couble.
¶ O que la mort viendroit bien a propos
Car luy ne moy en ce departement
Naurons iamais qu’a ſon aduenement
Contentement, bien, plaiſir, ne repos.
¶ Or venez donc et par compaſſion
Mectez noz corps vniz en terre obſcure
Auant ſouffrir qu’au departir iendure
Si treſextreme et dure paſſion.
AInſi parlant, sappuyant contre vng arbre,
En la facon dune femme de marbre
Qui na chaleur, vie, ne mouuement,
Les yeulx fermez, les dens pareillement,
A ſes ſouppirs deffailloit ſon alaine.
Moy qui la veis en ſi cruelle peine,
Ie pris ſes mains a frotter et tenir,
Tant qu’un petit ie la feis reuenir,
Et, en tournant ſon œil triſte vers nous,
Nous diſt helas, que voſtre ennuy eſt doulx
Au pris du mien qui ne peult plus durer.
Ce que ne peut la premiere endurer
VOus nauez mal, diſt elle, quun tout ſeul
Ceſt de laiſſer pour nous voſtre plaiſir.
Mais ien ay deux qui agrauent mon dœul
Las, ie nay pas ſeullement le loyſir
De regreter de mon amy la perte
Que le ſecond ne me vienne ſayſir.
¶ Amye, helas, ſi ma douleur couuerte
Sentiez, qui eſt fondee en ignorance,
Dont ne meſt point la verite aperte,
Vous iugeriez n’auoir pas la puiſſance
De la porter, car el’eſt par trop griefue.
Or dieu vous gard de telle congnoiſſance.
¶ Puis que l’honneur mect en voſtre amour trefue,
Plaiſir auez, gardant la longue foy
Que nous deuez, de la rendre ainſi briefue.
Si vous ſcauiez auſſi bien comme moy
Que ceſt de viure en doubte et en ſuſpens,
Peu voſtre mal eſtimeriez, ie croy.
¶ Sil me diſoit, daymer ie me repens
Ien oſteroys mon cueur qui de douleur
Perpetuel en payeroit les deſpens,
Ieſtimeroys a grant heur ce malheur,
Bien que ce neſt peu de deſpit ou honte
Deſtre laiſſée ainſi dun ſeruiteur.
¶ Le deplaiſir en eſt tel et tant monte
Que den laiſſer cent de ſa volunté
Ce neſt ennuy, dont lon deuſt tenir compte.
Voſtre cueur eſt de deſeſpoir tentè
Pour voſtre amy, c’eſt choſe raiſonnable,
Auſſi eſt il d’honneur bien contenté.
¶ Rendant lamour de lunion louable
D’entre nous troys, la gloire en receuez,
Qui voſtre ennuy doibt rendre tolerable.
Certes le mien, ſi bien lapperceuez,
Voirrez plus grant que le voſtre troys foys,
Si par faueur vous ne vous deceuez.
Le moindre ennuy de quoy compte ne foys
Ceſt de fuyr le plaiſir deſtre aymée
Dun treſhonneſte et parfaict touteſfoys.
Lautre ennuy eſt que ie voy abiſmée
En deſeſpoir celle que iayme tant
Par celuy ſeul dont ie ſuis eſtimee.
¶ Le tiers ennuy trop cruel qui pretend
Me mectre a mort, ceſt la doubte craintifue,
Aymant tresfort, de neſtre aymee autant.
Que dis ie autant ? Mais que lamour naifue
Soit morte en luy ainſi que ie la ſens
Dedans mon cueur plus parfaicte et plus vifue.
¶ Ces troys ennuyz me mectent hors du ſens
Et ſi ne voy moyen de men deffaire
Sinon mourir, à quoy ie me conſens.
Il neſt ennuy, qui tant de mal ſceuſt faire,
Sil eſt congneu, quon ne treuue moyen
Pour quelque peu au moins y ſatisfaire.
¶ Mais mon mal eſt incapable de bien,
Car ie le ſens et n’ay nulle aſſeurance
Si mon amy tient ou rompt ce lyen.
Si iuger veulx par treſſeure apparence,
Ie dis quil eſt rompu, mais ſon iurer
Me vient donner du contraire eſperance.
Las mon ennuy eſt pour long temps durer,
Car le ſuſpens de la concluſion
Quil faict daymer me contrainct dendurer.
Son doulx parler meſt vne illuſion
Qui maueugliſt ſens et entendement
Et de laymer me donne occaſion.
¶ Helas, ſes faictz parlent bien autrement,
Par eulx ie voy que de luy ſuis laiſſee.
Il dit que non, Verite dit quil ment.
Par ſes effectz ma ioye eſt rabaiſſee,
Par ſon parler elle ſe reſſuſcite,
Ainſi des deux ſans ceſſer ſuis preſſee.
¶ Si grand douleur grande pitie incite,
Plus que de vous, Ayez compaſſion
De mon malheur, qui a la mort me cite.
Celle qui na riens qu’vne paſſion
Dont la cauſe eſt congneue et bien certaine,
O quel’eſt près de conſolation.
De ſi et non iay la teſte ſi pleine
Que ſi le pis des deux pouoye ſcauoir
Ie le tiendroys à grace ſouueraine.
Mais le ſuſpens ſurmonte mon pouuoir.
COmment comment ?
Souſtenez vous eſtre plus grant torment
Doubter louy ou non de voſtre amant ?
Diſt la ſeconde,
Que de ſcauoir par eſpreuue et par ſonde
Que changement au plus parfond abonde
De ſon faulx cueur.
Eſtimez vous ſouppecon, doubte et peur
Comme vng ſcauoir certain ſans nul erreur ?
Ceſt cas eſtrange.
Mais moy qui ſcay de mon amy le change
Que ie tenoye auſſi parfaict qu’un ange
Que puis ie faire ?
Il le ma dit ſans point ſe contrefaire
Quil ſe voulloit de mon amour deffaire
Pour la remectre
Du tout en vous, ce que iamais permectre
Nauez voullu, mais bien vous entremectre
Par la pitye
Qu’auiez de moy, rabiller l’amytie
Dont ie retiens moy ſeulle la moyctie.
Si vous auez
Peine à fuyr ce qu’aimer ne deuez,
Que doy ie auoir ſinon les yeulx creuez ?
De lamenter,
Celuy qui tant me ſoulloit contenter
Qui ne me veult plus aymer ny hanter
Las ie le perdz.
Qui fut tout mien et a beaulx yeulx ouuers
Le voy fouyr, non pas par les deſers
Ny lieu ſauuage.
Mais droict a vous et deuant mon viſage
Il a tourne ſon ſainct pelerinage.
Il auroit bien
Changè en mieulx, ſil ne ſcauoit combien
Nous nous aymons, Et que ce qui eſt mien
Eſt voſtre auſſi.
Il fuyt de moy cherchant de vous mercy
Pour voſtre non, il pert de moy le ſy.
O cruaulte.
En mon endroit par ſa deſloyaulte
Et dans ſon cueur par voſtre grant beaulte,
Car vng ſeul compte
Vous n’en tenez, O mon dieu quelle honte
Il doit auoir, et peur que ie racompte
A vous amye
Et vous a moy le diſcours de ſa vie
Car entre nous ſa trop faulce alquemye
Eſt deſcouuerte.
Dont a moy ſeulle en demeure la perte
Vous ne ſcauez ſi elle eſt meure ou verte
Ceſte douleur.
Plus il vous dit ſa peine et ſon malheur
Plus vous mocquez de ſon mal et couleur
Point nen changez.
Et puis de luy ſi fort vous eſtrangez
Que ie voy bien que mon tort vous vengez
Tout en riant.
Et ie men voys a part pleurant, criant
Et dieu et ſainctz requerant et priant
Pour mon ayde.
Car ie ny voy ſans miracle remyde.
Ie l’ay perdu, et ny a croix ne guyde
Qui radreſſer
Le ſceuſt vers moy, ie ne le veulx preſſer
Et ſi ne puis ſon amour delaiſſer
Qui eſt plantee
Dedans mon cueur, et ſi tresfort entde
Que, bien quil m’ait du tout mal contentee,
Ie n’ay vigueur,
Force ou pouoir de l oſter de mon cueur
Qui eſt nourry et plein de ſa liqueur,
Et tranſmuè
En ceſt amour, tant que sil neſt tuè,
Il nen ſera ſeparè ne muè.
Or donc penſez
Quel voſtre ennuy eſt que vous aduancez
Plus que le mien, en quoy vous m’offencez.
Le pis de vous
C’eſt le doubter, Las quil me ſeroit doulx
Ie iugeroys mon amy tous les coups
Auoir le droict.
Ce ſouppecon pour vng temps me vauldroit
Et contre non, ouy me ſouſtiendroit.
Mais de ce non,
Certaine ſuis non point par faulx renom,
Car toutes troys pour meſchant le tenon
Pour variable,
Traiſtre et menteur, Et moy pour immuable
En fermete honorable et louable.
Qui me contrainct
Qu’autant de temps quen amour iuſte et ſainct
Ie l’ay portè dedans mon cueur empraint
Par amour forte,
Autant de temps pour meſchant ie le porte
Impoſſible eſt que iamais il en ſorte.
Sa laſchetè
Donnera fœille a ma grant fermetè.
O que lhonneur ſera cher achetè
De ne partir
Hors de lamour, dont le voy departir.
Ou eſt leſprit comme le mien martyr ?
Il nen eſt point.
Loyaulte la ſi fort en moy conioinct
Que mon cueur ſien, neſt plus mien, ceſt le poinct.
Et ſi mourir
Me fault ſans cueur, a la mort puis courir,
Car, arrachant celuy qui peult nourrir
En luy la vie,
De luy bien toſt elle ſeroit rauie
Las iauroys bien de ceſte mort enuie,
Mais luy en moy
Viure me faict en tel dueil et eſmoy
Quil me faiſoit viure damour et foy
En grant plaiſir,
Durant le temps que par heureux loyſir
Me racontoit ſon honneſte deſir.
Or eſt paſſè
Tout ce beau temps, ou ie nay amaſſè
Riens que regret et eſpoir que ſon tort
Mapportera bien congneu par ma mort
De tous amans Requieſcat in pace.
LA tierce, oyant leur gracieux debat
Plus par ennuy, que par plaiſant eſbat
Diſt, Ie vous pri’et requiers toutes deux
Neſtimer tant Lune ſa peur et doubte
Lautre ſon dueil, qu’vng peu lon ne meſcoute
Puis que pour vous de bon cueur ſouffrir veulx
¶ Voz maulx ſont grands, nulle doubte nen foys
Viure en ſuſpens ſans reſolution
Par lamy plein de toute fiction.
Mais le mien neſt pas moindre toutesfoys.
¶ Car mon amy loyal et veritable
Ou iay trouuè tout ce que ie deſire,
Me fault laiſſer, pour me faire en martyre
Et en malheur a vous autres ſemblable.
¶ Las ſi en luy ſcauoye riens dimparfaict
Ou qu’enuers moy en quelque cas euſt tort,
Noſtre lyen qui en ſeroit moins fort
Sans grant douleur plus toſt ſeroit deffaict.
¶ Mais il ny a occaſion aucune
Entre nous deux, qui double mon torment
Dainſy laiſſer vng ſi parfaict amant
Pour receuoir part en voſtre infortune.
¶ S’il ne m’aymoit, il me ſeroit aiſè
De le laiſſer, ou bien ſi en doubtance
Ieſtoye de luy par ſa grand inconſtance
Mon dueil ſeroit doulcement appaiſè.
Helas il na riens dimperfection
Car ſon corps eſt parfaict, ſon cueur ſans vice,
En tout honneur ma faict loyal ſeruice
Las dure en eſt la ſeparation.
¶ Laiſſer celuy de qui ne ſuis aymee
Qui ne le vault, qui eſt fainct ou meſchant,
Ou qui de nous la honte va cherchant
Ie nen pourroye eſtre mal eſtimee.
¶ Mais dung parfaict qui mayme tant, helas,
Le departir men eſt trop importable,
Car ſon amour demourra pardurable
Dedans mon cueur qui de laymer neſt las.
¶ Ie pers de luy la parolle et la veue
Et tout le bien dont ie ſoulloys iouyr,
Et ne retiens riens pour me reſiouyr
Que ſon amour, dont ie ſuis bien pourueue.
¶ Ceſt bien raiſon qu’apres le congie pris,
Que dis ie pris ? Mais donnè ſans ſa faulte,
Sa grand amour tant vertueuſe et haulte,
Se mecte ailleurs, ia nen ſera repris.
¶ Mais ceſte la que iay par luy conceue
Me demourra pour doulce nourriture,
Dedans mon cueur de tant ferme nature,
Nulle autre amour ne ſera plus receue.
Vous deux perdez l’amour de voz amys
Mais deulx auez la parolle et la veue,
Moy, iay lamour treſcertaine et congneue
Mais tout plaiſir pour vous iay dehors mis.
¶ Car le parler, et la veue ie quitte
Ceſt tout mon bien que pour vous iabandonne
O quel threſor amyes ie vous donne
Fault il qu’amour ainſi vers vous m’acquitte.
¶ Lon tient qu’il neſt nul plus cruel martyre
Que pour ſon dieu dung propos voluntaire
Fuyr plaiſir, et en lieu ſolitaire
Soy ſeparer du bien que lon deſire.
¶ Car le martyr ſouffrant cruel torment
Par main dautruy, mect toute ſa ſcience
De ſouſtenir ſon mal par patience
Qui de tous maulx eſt le ſoulagement.
¶ Vous endurez par le tort et le vice
De voz amys en deſpit de voz cueurs
Pis que la mort, O petites douleurs
Miſes aupres de mon grand ſacrifice.
¶ Pour vous aymer, celuy ou ie me fie
Trop plus qua moy, que iayme, que ieſtime,
Mon bien, mon heur, ien foys vne victime
Et voluntiers pour vous le ſacrifie.
¶ Non pas que mort le vueille preſenter
Mais tout viuant, qui meſt plus grand regret
Sans retenir vng ſeul bien en ſecret
Ny dung ſeul mal me voulloir exempter.
¶ Auecques luy tout plaiſir ie renunce
De veoir, douyr, de penſer, de parler,
Parquoy dennuy (point ne le fault celer)
Ien ay le marcq, ſi vous en auez lunce.
¶ Sa grant bonte et ſa perfection
Entretiendront en moy ceſte amour forte,
Qui naura fin tant que ie ſoye morte
En ce poinct ſeul iay conſolation.
¶ Car deſperer iamais plus le rauoir
Layant laiſſè, ce ſeroit grant follie,
Ou il mourra par grand melancolie
Ou il fera daymer ailleurs deuoir.
Las ſil en meurt ie pers mon eſperance
Sil ayme ailleurs plus a moy ne viendra,
Car ou lamour le lyera, ſe tiendra
Ie congnoys bien ſa grand perſeuerance.
¶ Mort ou aymant ie le pers ſans eſpoir
De le rauoir, ma perte eſt toute entiere,
Mais vous auez (dames) deſpoir matiere
Ce que ie veulx bien cler vous faire veoir.
¶ Si lune voit les effectz accorder
De ſon amy auecques ſa parolle
Ie ne la tiens ſi ſotte ne ſi folle
Quelle voulluſt ſes faultes recorder.
¶ A lautre auſſi, Lamy qui ſen viendroit
Luy demander en grande repentence
Pardon, en lieu de dure penitence
Plus de ſes maulx il ne luy ſouuiendroit.
¶ Or tous ces biens vous peuuent aduenir
Car vous nauez pas eſleu voſtre peine
Mais moy, ie ſuis de ma perte certaine
Sans nul eſpoir quil puiſſe reuenir.
¶ Que perdez vous ? vng mauluais, et vng fainct,
Et moy vng bon, ſans vice ny ſans faincte,
Lequel perdant daymer ie ſuis contraincte
Laiſſant le bien que perdre iay tant crainct.
¶ Fortune ou dieu ce bien icy ne m’ouſte
Ceſt moy ſans plus qui de mon cueur larrache
Affin que mieulx vnie ie m’attache
A voz malheurs, O que cher il me couſte.
¶ Brief voz eſpoirs, et ma deſeſperance
Les meſchans tours de vos cruelz amys,
Et les vertuz que dieu au mien a mis
Font de voz maulx au mien la difference.
Plus toſt le iour nous euſt peu deffaillir
Que ces dames de leurs propos ſaillir
Qui me ſembloit eſtre a recommencer,
Mais regardant la nuict trop sauancer
Contraincte fuz dempeſcher le diſcours
De leurs propos que ie trouuoys trop cours.
Car ie n’ouy oncques femmes mieulx dire
Pour ſentir tant qu’elles dennuy et d’Ire.
Et ſi le lieu ou falloit retourner
Euſt eſtè pres, voluntiers ſeiourner
Lon nous euſt veu iuſques au lendemain
Paſſant la nuict a ce doulx air ſerain.
Celles en qui ſerain trauail, ſommeil
Neſtoit ſenty, et du treſcler ſoleil
Labſence eſtoit de leurs yeulx incongnue
Et de la nuyct la ſoubdaine venue,
Congnurent bien, eſcouttans ma raiſon
Que du partir eſtoit heure et ſaiſon.
Qui leur deſpleut, car chacune nauoit
De ſon ennuy dict ce qu’elle ſcauoit.
Parquoy en pleurs voulurent reueler
Ce que le temps les contraignoit celer.
Et de lermes et ſouſpirs feirent langues
Pour acheuer ſans parler leurs harangues.
Las, ce plourer me monſtra le torment
Dont ne ſcauoys que le commencement
Car leur parler, les lermes confirmerent
Quel fut lennuy de celles qui aymerent.
Ie ne croy pas que perdre pere et mere
Sceuſt engendrer paſſion plus amere,
Que ie leur vey porter et ſonſtenir.
Mais ſur le poinct de nous en reuenir
Prindrent leurs criz et pleurs a redoubler,
Tant que ſoubdain feirent le ciel troubler
Qui d’elles print telle compaſſion
Que ſa doulceur par grant mutation
Se conuertit en tonnoirre et tempeſte,
En pluye et vent tant qu’aulx champs ny eult beſte
Qui ne cerchaſt cauerne ou couuerture
Pour ſe cacher, voyant telle aduenture.
En eſſuyant leurs yeulx et leurs viſages
Toutes les troys tant honneſtes et ſages
D’abandonner ce prè furent contrainctes
Laiſſans au ciel acheuer leurs complainctes.
La pluye en creut, lors chacune deſcoche
Et nous meiſmes toutes quatre en la coche
Qui attendoit noſtre departement
Apres les autres couruſmes vyſtement.
MAis en allant pour oſter le diſcord
De leurs propos, et les mectre daccord,
Ie leur requis voulloir vng iuge prendre
Qui leurs debatz voulluſt et peuſt entendre.
Car auſſi toſt que lune ieſcouttoys
De ſon coſte ſoubdain ie me mectoys.
Et puis quant lautre auoit comptè ſon cas
A qui ne fault bailler nulz aduocatz
Ie me rendoye à ſon opinion.
¶ Pour les tenir doncques en vnion
Ung bon eſprit leur eſtoit neceſſaire
Et quant a moy ie m’obligeoye de faire
Tout mon pouoir, que ie ſens trop petit
Pour reciter non à mon appetit
Tous leurs propos, mais au moins ma puiſſance
Neſpargneray a donner congnoiſſance
De leurs ennuyz comme leur ay promis
Sans qu’un ſeul mot de leurs dictz ſoit obmis.
NOſtre debat ce me diſt la premiere
Mect noſtre eſprit en tell’obſcurite
Quil ne nous fault pas petite lumiere.
Ie nen ſcay qu’un qui a la verite
Puiſſe iuger qui plus a de doleur
Et plus dhonneur par ſouffrir meritè.
¶ C’eſt celuy ſeul duquel la grant valeur
Na ſon pareil, et a tous eſt exemple
Des grans vertuz, par qui saquiert honneur.
Ceſt luy qui peult triumpher en ſon temple
Ayant paſſè par celuy de vertu.
Ceſt luy que ciel, et terre, et mer contemple.
¶ La terre a ioye le voyant reueſtu
Dune beaulte, qui na point de ſemblable
Au prix duquel tous beaulx ſont vng feſtu.
La mer deuant ſon pouoir redoubtable
Doulce ſe rend, congnoiſſant ſa bontè
Et eſt pour luy contre tous fauorable.
¶ Le ciel s’abaiſſe et, par amour domptè
Vient admirer et veoir le perſonnage
Dont on luy a tant de vertuz comptè.
Ceſt luy lequel tout le diuin lignage
Des dieux treſhaulx, ont iugè quil doit eſtre
Monarche ou plus ſi ſe peult dauantage.
¶ Ceſt luy qui a grace & parler de maiſtre
Digne dauoir ſur tous gloire et puiſſance
Qui ſans nommer aſſez ſe peult congnoiſtre.
¶ Ceſt luy qui a de tout la congnoiſſance
Et vng ſcauoir qui na point de pareil
Et nya riens dont il ait ignorance.
De ſa beaulte il eſt blanc et vermeil
Les cheueulx bruns, de grande et belle taille
En terre il eſt comme au ciel le ſoleil.
¶ Hardy, vaillant, ſaige et preux en bataille
Fort, et puiſſant, qui ne peult auoir peur
Que prince, nul tant ſoit il grant, laſſaille.
¶ Il eſt begnin, doulx, humble en ſa grandeur
Fort, et conſtant, et plein de patience
Soit en priſon, en triſteſſe ou malheur.
Il a de dieu la parfaicte ſcience
Que doit auoir vng Roy tout plein de foy
Bon iugement, et bonne conſcience.
¶ De ſon dieu garde et lhonneur et la loy
A ſes ſubiectz doulx ſupport et iuſtice
Brief luy ſeul eſt bien digne deſtre Roy.
Si pour lenfant eſtainct, par trop grant vice,
A Salomon demanderent les femmes
Le iugement, par ſon royal office,
¶ Nous ne pouons encourir aucuns blaſmes
Quant a ce Roy plus grant que Salomon,
Preſenterons la douleur de noz ames.
Et sil luy plaiſt lire ce long ſermon
Il iugera qui ſouſtient la plus grande,
Auſſi lamour, dont point ne nous blaſmon.
¶ Dames le Roy pour iuge ie demande,
Qui iugera a noſtre affection
Lhonneur, auſſi a noſtre fiction
Punition par honorable amende.
QUant ie la vey choyſir ſi haultement
Crainte me print en luy diſant, vrayement
Si deuant lœil dun ſi parfaict eſprit
Falloit monſtrer mon trop mal faict eſcript
Vous pourriez bien prendre ailleurs ſecretaire.
Iaymeroys mieulx me deſdire et me taire
Car dempeſcher ſa veue et ſon bon ſens
Sur mes beaulx faictz, iamais ne my conſens.
Les plus parfaictz ou ny a que remordre
Lyment leurs faictz, et les mectent en ordre
Premier que ozer ſans bien les acouſtrer
Deuant tel Roy ſi ſcauant les monſtrer
En craignant plus de luy le iugement
Que du ſurplus de tout le firmament.
Moy donc qui ſuis des eſcriuans la moindre
Et moins que rien, ne doy ie pas bien craindre ?
Voz bons propos bien dignes deſtre veuz
Rendre par moy indignes deſtre leuz
Deuant le Roy, ou ne fault preſenter
Rien, qui ſon ſens ne puiſſe contenter.
¶ Plus le louez, plus de crainte me prent
Car ceſt celuy de qui chacun apprent,
Qui ſcait louer le bien en verite
Et rendre au mal ce quil a meritè.
Or choyſiſſez vng iuge tel que moy
Car sil falloit monſtrer deuant le Roy
Vng ſi treſbas et mal tyſſu ouurage
Ie nauroye pas deſcrire le courage.
LE Roy vrayement
Diſt lautre apres, ieuſſe eſleu iuſtement
Car qui eſt plus que luy parfaict amant ?
Ne qui entend
Mieulx quil ne faict ou vraye amour pretend
Il a aymè ſi fort, ſi bien, et tant
Quil peult entendre
Ce qui en eſt, et la raiſon en rendre
Par ſon bon ſens qui a tous peult apprendre.
L amour loyal
Ferme et parfaict dedans ſon cueur royal
A faict ſon throſne et ſon hault tribunal,
Pour iuger tous
Les vrays amans, ſaiges, hardiz, et doulx,
Et ſe mocquer des glorieux et foulz
Qui font les braues,
Oultrecuydez, penſans faire les graues
Puis reffuſez, bien ſotz font les eſclaues,
Car ceſt le rolle
Quil fault iouer, ou deffault la parolle
Et le bon ſens, et quelque poure folle
Ou les craindra,
En brauegeant ou pour morts les tiendra,
Ne parlant plus, ce que point naduiendra
A vne ſage.
Qui prend plaiſir douyr vng bon langage
Dit dun bon cueur vertueux, dun viſage
Plein dune audace,
Dune doulceur et dune bonne grace
Qui plaiſt touſiours a chacun quoy quil face.
Celuy aura
Du Roy lhonneur, bien choyſir le ſcaura,
Par luy chacun bien receuoir pourra
Iuſte ſentence.
Luy ſeul congnoiſt leſtre et la ſubſiſtance
Damour, le bien auſſi, la penitence
Quil peult donner.
Combien quil ſoit roy et puiſſe ordonner,
Son cueur humain na craint dhabandonner
Lauctorite,
De commander, contre la charite
Il ayme mieulx ſouffrir lauſterite,
La paſſion
Que donne a tous le dieu daffection
Et comme eſtant dautre condition
Veult s’aſſeruir,
Par ferme amour, par ſeur et long ſeruir
Et par vertuz, des dames deſſeruir
Bon traictement.
En deſpriſant force et commandement
Si luy plaiſoit il feroit autrement.
Mais ſon hault cueur
A ioinct lamour, la vertu et lhonneur
Qui la rendu de cruaulte vainqueur.
Parquoy la palme,
Louenge et gloire, et renommee et fame
Luy doit damour tout homme et toute femme.
Puis que luy ſeul
Vous n’acceptez pour iuge, dont iay dueil
Vous qui auez faict ce piteux recueil
De noſtre hyſtoire.
Vous en auez mieulx qu’un autre memoire
Et neſtes pas ſans quelque experience
Que ceſt damour, ie vous en veulx bien croyre
Or iugez nous en bonne conſcience.
IE ne veulx point de mon ſens abuſer
Mes dames dis ie ains treſbien mexcuſer
Que ie ne ſuis pour iuger ſuffiſante,
Et auſſi peu a eſcrire duyſante
Voſtre debat, mais deſir de ſcauoir
Tous voz ennuyz ignorant mon pouoir
Me feiſt ſoubdain ſans y penſer promectre
De les eſcrire et dans vng liure mectre.
Ma foy promiſe auſſi voſtre priere
Meirent ma peur, et ma raiſon derriere.
Ceſte premiere et trop folle entrepriſe
Veulx mectre a fin, mais ſi vous plaiſt repriſe
Ie ne ſeray de la ſeconde erreur,
Qui doy auoir de la premiere horreur.
¶ Mes Cinquante ans ma vertu affoyblie,
Le temps paſſè, commandent que i’oublye
Pour mieulx penſer a la prochaine mort,
Sans auoir plus memoire ny remort
Si en amour, a douleur ou plaiſir.
Doncques vueillez autre iuge choyſir
Qui iuſtement vous puiſſe ſatiſfaire.
Ie ne le puis, ny ne le ſcauroys faire.
LA tierce diſt, Dames, voicy pitie
Quant celuy ſeul nous ne pouons auoir
Qui eſt labiſme et ſource de ſcauoir
Et qui congnoiſt la parfaicte amytie.
¶ Seure ie ſuis que plus toſt preſentè
Neuſt a ſes yeulx, ce liure pour le lire
Que tout ſoudain ne nous euſt bien ſceu dire
Qui a le cueur de douleur plus tenté.
¶ Son œil deffaict toute faintiſe et ruze
Son ſens entend la fin de tous propous,
Et ſon cueur ſent mieulx qu’en touchant le poulx
Qui ayme ou non, Brief, nully ne labuſe.
¶ Si nous perdons de luy le iugement
Et de ſa ſeur, qui de luy doit tenir
Et ſes propos vertueux retenir,
Vng autre iay en mon entendement.
Ceſt ceſte la qui na gloire petite
De noſtre temps, mais la plus eſtimee
Eſt, et la plus parfaictement aymee,
Ce que treſbien par ſes vertuz merite.
¶ Si par beaulte ſe congnoiſſent les femmes,
Allez ou ſont dames et damoyſelles,
Comme vng ſoleil au mylieu des eſtoilles
Vous la verrez parmy toutes les dames.
¶ Si par vertu ſon nom ſe doit congnoiſtre,
Voyez ſes faictz, qui ne ſont point cachez
Tous pleins d honneur de nul vice tachez
Vous la verrez deſſus toutes paroiſtre.
¶ De ſes bienfaictz chacun luy rend louenge
Ilz ſont congneuz de tous les gens de bien
Pour ſes amys elle n’eſpargne rien
Et des meſchans ennemys ne ſe venge.
¶ Si on congnoiſt le nom par la fortune
De biens, d honneur, de richeſſe et faueur
Voyez qui ha de ſon maiſtre et ſeigneur
Ce qui luy plaiſt ſans luy eſtre importune.
¶ Mais tous les biens qu’elle en peult receuoir
Ne luy ſont riens, car ſeullement heureuſe
Se tient de veoir par amour vertueuſe
Tenir les cueurs vniz comme on peult veoir.
¶ Les cueurs du plus parfaict, et plus parfaicte
Que l’on peult veoir, en qui dieu et nature
Nont riens obmis de ce que creature
Pour acquerir perfection ſouhaitte.
¶ Acceptez donc madame la ducheſſe
Qui en vertuz et honneur paſſera
La plus parfaicte qui ſoit, ne qui ſera
Ne qui fut onc, a elle ie madreſſe.
¶ Elle congnoiſt que ceſt de bien aymer
Le vray amant la tient à ſon eſcolle
On le peult bien congnoiſtre a ſa parolle
Qui tant ſe doit priſer et eſtimer.
¶ Quant elle aura veu noſtre doulx combat
Seure ie ſuis que ſans fauoriſer
Lune partie et lautre deſpriſer
Fera la paix de noſtre long debat.
TOutes voyans ſa bonne election
A la ducheſſe ou giſt perfection
Le iugement ont remis de leur faict.
Et moy voyant que iuge plus parfaict
Lon ne pourroit en ce monde trouuer,
Leur bon aduis voullu bien approuuer.
En leur diſant poſſible neſt de mieulx
Dames choyſir, pour moy deſſoubz les cieulx.
Par ſon bon ſens de iuſtice vſera
Et ſa doulceur ma faulte excuſera.
Et sil aduient, et que bon il luy ſemble
Que le propos, et leſcripture enſemble
Deuant le Roy puiſſe eſtre deſcouuert,
Seure ie ſuis qu’ayant le liure ouuert
Regardera les poinctz où le lecteur
Se doit monſtrer aduocat de l acteur.
Et en louant voz entreprinſes haultes
Excuſera mes ignorantes faultes.
Et ſeruira de doulce couuerture
Sa grant bonte, a ma poure eſcripture.
Et ſi pouez croire que ſa ſentence
Telle ſera comme le Roy la penſe.
AInſi pourrez par ce treſſeur refuge
Auoir le Roy que deſirez pour iuge,
Qui ſans reffuz dun cueur doulx et humain
Regardera, venant de telle main
Tout ce diſcours qui eſt digne de luy,
Et leſcripture aura pour son appuy
Celle qui peult la deffendre de blaſme
Et lexcuſer comme vne œuure de femme.
Ainſi pourra couurir ſa charite
Deuant les yeulx de la ſeuerite
Du Roy, qui faict a tous iugement droit
Ce que iay trop failly en chaſque endroit.
LOrs dun accord sur le poinct nous trouuaſmes
Que dans la coche au logeis arriuaſmes.
La nuict me feiſt aux troys donner ladieu,
Non pour dormir, mais pour trouuer vng lieu
Ou ſans auoir de nul empeſchement,
Peuſſe acquitter ma promeſſe et ſerment.
Mais en voyant du propos la grandeur
De mon langage et termes la laydeur,
Honte me faict finer ma mauuaiſe œuure
Mais verite veult que ie la deſcœuure
A celle la que ie prens pour ayde
Pour mon ſecours et ſouuerain remyde.
CEſt donc a vous ma couſine et maiſtreſſe
Que mon labeur et mon honneur i’adresse
Vous requerant comme amye parfaicte
Que vous teniez ceſte œuure par moy faicte
Ainſi que voſtre et ainſi en vſez,
Et la monſtrez celez ou excuſez.
Faictes au Roy entendre la ſubſtance
Pour a ces troys donner iuſte ſentence.
Voſtre parler luy fera mieulx ſcauoir
Tout le diſcours que de luy faire veoir
Ce liure auquel mon eſcripture efface
Tout le plus beau et la meilleure grace
De leurs propos, deſquelz iay bien ſuyuie
La verité mais la grace et la vie
Qui eſt dedans, ie l’ay toute ſouillee
De faſcheux motz empeſchée et brouillee,
Tant que ie doy en lieu daugmenter, craindre
La grant valeur du propos faire moindre.
Quant eſt de vous, honteuſe ie ne ſuis
De vous monſtrer le mieulx que faire puis.
S il y a riens digne de mocquerie
Mocquez vous en point n en ſeray marrye,
Car ſeure ſuis qu’a vng ſecond ne tiers
Ne monſtrerez ma faulte voluntiers.
Fors a celuy qui ſur tous a pouoir,
Enuers lequel vous ferez tout deuoir
De mexcuſer, ien ſuis bien aſſeuree.
Car ceſte amour en noz cueurs emmuree
Soit de monſtrer ce liure ou le cacher
Fera ſi bien quon ne pourra toucher
À mon honneur quentre voz mains ie mectz,
Comme à la dame en qui ie vous promectz
Jay mis cueur, corps, amour, entendement
Où ne verrez iamais nul changement.
Parlant de moy, oublier ie ne doy
Celles de qui la douleur, ie le croy,
Merite bien que vous vueillez entendre
Leurs paſſions car elles veullent tendre
A qui aura de bien aymer lhonneur
Et dauoir plus dans le cueur de douleur.
Ou ceſte la qui en ſuſpens demeure
Pour vng amy, chaſſant l’autre a toute heure.
Ou ceſte la de lamy delaiſſee
Qui de regret importable eſt preſſee.
Ou l autre qui laiſſe vng amy parfaict
Pour reſſembler, et en dict et en faict,
Aux autres deux et lunion tenir
Ou ferme amour leurs troys cueurs faict vnir.
Et ceſte la ſe tiendra bien heureuſe
Que vous direz des troys plus douloureuſe.
Et ſon malheur a treſgrant bien tiendra
Quant ſur les deux voſtre arreſt obtiendra,
De plus auoir qu’elles daſpre douleur
Ennuy, tourment, deſeſpoir et malheur.
Les deux auſſi, quant iugees ſeront
De voſtre main, bien s’en contenteront.
Et ie ſeray trop plus qu’elles contente
Si mon labeur, lequel ie vous preſente,
Vous donne autant en lyſant de plaiſir
Quen leſcriuant ien ay eu de deſir.
Or le prenez et penſez quil procede
De qui le lieu a nulle autre ne cede
De vous aymer et actendant le bien
Que dieu vng iour me donne le moyen
De vous monſtrer par effect ma penſee,
Je luy requiers qu’ainſi que commencee
Il a en vous fortune ſi treſbonne
Que maintenant et pour iamais vous donne
Autant de bien dhonneur et de ſante
Comme il en fault pour eſtre contentè
A voſtre cueur plein damour et de foy
Et tout autant que ien deſire au Roy.
● Plus vous que moy. ●
Ayant perdu de l’aveuglé vainqueur
Non seulement le sentement du cœur,
Mais de son nom, dits et faits la mémoire,
Ayant perdu le pouvoir et la gloire
Et le plaisir de la douce écriture,
Où tant je fus incline de nature,
Me trouvant seule en un lieu si plaisant
Que le haut ciel se rendait complaisant
Par sa douceur et par sa tempérance
À la verdeur du pré plein d’espérance
Environné de ses courtines vertes,
Où mille fleurs à faces découvertes
Leurs grand’s beauté découvraient au soleil,
Qui, se couchant à l’heure, était vermeil
Et laissait l’air sans chaud ni froid, si doux
Que je ne sais cœur si plein de courroux
De ire et d’ennui, qui n’eût eu guérison
En un tel lieu, fors moi, qui sans raison
Fuyant les gens me retirai à part,
Pour n’avoir plus à leur passe-temps part,
Car cœur qui n’a de plaisir une goutte,
D’en voir ailleurs il a peine sans doute.
Par une sente où l’herbe était plus basse
Me dérobai, comme femme non lasse,
Hâtivement, pour n’être point suivie,
Car de parler à nul n’avait envie
En mon chemin je trouvai un bon homme ;
Là m’arrêtai en lui demandant comme
L’année était et qu’il en espérait,
Qu’il avait fait, qu’il faisait, qu’il ferait
De sa maison, femme, enfants et ménage,
De son repos et de son labourage,
Prenant trop plus de plaisir à l’ouïr
Qu’en ce que plus me soulait réjouir.
Ainsi parlant, pensant toute seule être,
Je vis de loin trois dames apparaître,
Saillants d’un bois haut, feuillu et épais,
Dont un ruisseau très clair, pour mettre paix,
Entre le bois et le pré se mettait.
Portant le noir et l’une et l’autre était
D’une grandeur ; Collets, tourets, cornettes
Couvraient leurs cols, leurs visages et têtes.
Leurs yeux je vis vers la terre baissés,
Et de leurs cœurs par trop d’ennui pressés
Saillaient soupirs dont tout l’air résonnait,
Mais un seul mot leur bouche ne sonnait.
Leur marcher lent montrait bien que tristesse
Rendait leurs pieds aggravés de faiblesse.
Lors quand je vis un si piteux objet,
Pensé en moi que c’était un sujet
Digne d’avoir un Alain charretier
Pour les servir comme elles ont métier.
Car moi qui ai trop grande expérience
Pouvais très bien juger sous patience
Leur passion très extrême être close :
J’ai maintes fois soutenu telle chose !
Qui me fit lors désirer de savoir
Si pis que moi elles pouvaient avoir.
En ce désir vers moi les vis venir,
Toujours leurs yeux contre terre tenir,
Que j’aperçus, quand furent près de moi,
jeter ruisseaux dont ne puis ni ne dois
La vérité trop étrange celer,
Car je les vis comme un fleuve couler.
Je fis du bruit, dont elles m’avisèrent
Et l’une à l’autre un petit devisèrent ;
En essuyant leurs yeux secrètement
Vinrent vers moi, me disant doucement :
« Il vous serait, madame, mieux duisant
Parler à nous qu’à ce fâcheux paisant. »
Mais quand je vis découverts leurs visages,
Auxquels nature avait fait tels ouvrages
Qu’à leurs beautés nulle autre n’approchait,
Il me sembla que nature péchait
D’avoir laissé amortir leur couleur,
Car je ignorais encores leur douleur.
Je connus lors que c’étaient les trois dames
Que plus j’aimais, de qui Dieu corps et âmes
Avait remplis de vertus, de savoir,
D’amour, d’honneur, autant qu’en peut avoir
Nul corps mortel, de bonté et de grâce.
Mais de beauté l’une l’autre ne passe,
Ni de façon, parole et contenance.
Leur trinité, sans nulle différence,
Démontrait bien par l’union des corps
Qu’amour leurs cœurs unis par doux accords.
Croyez pour vrai que pitié et désir
De soulager leur couvert déplaisir
Me contraignit leur dire en soupirant :
« Un mal caché va toujours empirant,
Et, s’il est tel qu’il ne puisse être pire,
Il s’amoindrit quelques fois à le dire.
Moi donc jugeant par trop apparents signes
Que vous portez le mal dont n’êtes dignes,
Je vous requiers par l’amour qui commande
Sur tous bons cœurs, octroyez ma demande
Et dites moi la douleur et la peine
Que vous souffrez, dont chacune est si pleine
Que sans mourir ne la pouvez porter.
Si je ne puis au moins vous conforter,
Je souffrirai par grande compassion
Avecques vous la tribulation.
Vous êtes trois, il vaut mieux être quatre
Et nous aller dedans ce pré ébattre.
Et ne craignez privéement parler,
Car comme vous je promets le celer. »
« Las ! Ce n’est pas par doute de secret
Que nous craignons compter notre regret,
Lequel voudrions être par vous écrit.
Mais nous voyons maintenant votre esprit
Si paresseux, si fâché ou lassé
Que ce n’est plus celui du temps passé ;
Qui nous fait peur que la peine d’entendre
Notre malheur refuseriez de prendre. »
« Dames, pour Dieu, n’attribuez à vice
Si j’ai laissé longtemps à cet office,
Pensant pour vrai qu’amour n’avait omis
Un seul des tours qu’il fait en ses amis
Qu’en mes écrits passés ne soit trouvé
Et de mon temps vu, ouï ou prouvé. »
Et si leur dis : « je reprendrai la plume
Et ferai mieux que je n’ai de coutume
Si le sujet me voulez découvrir. »
Ainsi disant vis leurs doux yeux couvrir
D’une nuée de larmes dont la presse
Les fit sortir par pluie trop épaisse.
Me regardant me prirent pour aller
Dedans le pré, où longtemps sans parler
Allâmes loin. Et lors leur prit à dire :
« Si ne parlez, je n’ai garde d’écrire !
Pour Dieu tournez le pleur qui vous affole
À décharger votre ennui par parole. »
L’une me crut, non la moins vertueuse
Ni ennuyée, et dit à voix piteuse :
« Ô vous amants, si pitié jamais eut
Sur vous pouvoir de convertir en larmes
Vos tristes yeux, si jamais douleur put
Brûler vos cœurs par ses cruels alarmes,
Et si jamais amour vos langues fit
Fondre, disant piteux et tristes termes,
Oyez le plaint du cœur non déconfit,
Mais en mourant toujours prêt de porter
Ce que lui donne amour, qui lui suffit.
Nous sommes trois dont le réconforter
Impossible est, car sans notre amitié,
Sans mort tel mal ne saurions supporter
L’une de l’autre à égale pitié,
Égale amour, égale fantaisie,
Tant que l’une est de l’autre la moitié.
Entre nous trois n’y eut onc jalousie
Oncques courroux, oncques diversité »
Si l’une a mal, l’autre en est tôt saisie.
Du bien, aussi de la félicité
L’une n’en a que l’autre n’y ait part,
Pareillement part en l’adversité.
Mort pourra bien des corps faire départ,
Mais nul malheur n’aura jamais puissance
De mettre un cœur des deux autres à part.
Or eûmes nous toutes trois jouissance
Du plus grand bien qui peut d’amour venir
Sans faire en rien à notre honneur offense.
Hélas que dur m’en est le souvenir,
Et me voyant advenir le contraire
Du bien très sûr que je pensais tenir !
Ô faint amour, pour nos trois cœurs attraire,
Tu leur donnas la fin de leur désir
Que tu leur viens hors de saison soustraire !
Trois serviteurs tels que l’on doit choisir
Eûmes par toi, dont la perfection
D’un paradis nous était le plaisir.
Beauté, bonté, très forte affection,
Très ferme amour, bon sens, bonne parole,
C’était le pis de leur condition.
Leur amitié n’était légère ou folle ;
Leur grâce était sage, douce, assurée ;
Et de vertu pouvaient tenir école.
Par leur amour, grande et démesurée
Nos cœurs aux leurs rendirent si unis
Que la douleur nous en est demeurée ;
Car d’un tel heur furent si bien garnis
Qu’ils n’eussent su jamais souhaiter mieux ;
Las, ils en sont maintenant bien punis !
Sur tous le mien, malheureux, ennuyeux,
Qui sent très bien le cœur de son ami
Tout différent du parler et des yeux.
Ô trop cruel et mortel ennemi
Qui vois mon cœur languir de telle sorte,
Que ne mets-tu ton épée parmi,
En m’assurant qu’à une autre amour porte
Et que de moi plus il ne te souvient ?
Bien tôt serait ou consolée ou morte !
Mais je ne sais quel malheur te retient
De m’en celer ainsi la vérité,
Ou si à toi ou si à moi il tient.
À moi ? Las non ! Amour et charité
Ont bien gardé mon cœur de t’offenser,
Comme toi moi, sans l’avoir mérité.
Je ne sus onc nulle chose penser,
Que pour ton bien et honneur se pût faire,
Où l’on ne m’ait soudain vue avancer.
J’ai bien voulu mon ferme cours parfaire
Et te montrer qu’amour leale et bonne
Tu ne saurais par ta faute défaire.
De ton côté, ô trop feinte personne !
Je ne sais rien dont te puisse argüer,
Fors que ton cœur au mien plus mot ne sonne.
De ton parler je ne vois riens müer :
Tu dis m’aimer ainsi qu’as de coustume,
Mais par mentir, je crois, me veux tüer.
Car en t’aimant ma vie je consume
Et en sentant que tu ne m’aimes point
Mon cœur se fait de patience enclume.
Il est au tien, ainsi comme il fut, joint
Et le tien non, bien qu’en mentant tu dis
Qu’il est tout mien et Dieu le te pardoint !
Qu’est devenu le regard de jadis,
Qui messager était de ton feint cœur,
À qui du mien jamais ne contredis ?
Et le parler qui par douce liqueur
Le rendait mol et faible à se défendre,
Dont toi, ami, demeurais le vainqueur ?
Tu dis m’aimer ? Mais qui le peut entendre,
quand tous les tours et les signes d’amour
En toi vois mors et convertis en cendre ?
Ô malheureux pour moi ce premier jour
Où je cuidais mon heur prendre naissance
Et pour jamais faire en moi son séjour !
Or ne vois plus en toi forme ni essence
De cette amour que je cuidais si ferme ;
Je n’en ai plus tant soit peu connaissance.
J’ai bien douté souvent, je le t’afferme,
Qu’en autre lieu eusses ton amour mise,
Qui t’eût mis hors de cet honnête terme.
La vérité diligentement quise
J’ai sans cesser et trouvé pour certain
Que tu ne l’as encor en nulle assise.
Qu’esse de toi ? Sera ton amour vain ?
Ou bien est-il de toi du tout sailly ?
Dis-le-moi franc et me baille la main
En me quittant, sans que j’aie failli
La foi promise et de moi bien gardée
Et non de toi, vaincu non assailli.
Assez tu m’as hantée et regardée,
Mais en nul cas qui sût ou pût déplaire
À un ami, ne m’as vue hasardée.
Or ne sais je, malheureuse, que faire,
Puis que de toi un mot ne puis tirer
De vérité, qui me peut satisfaire.
Je te vois triste et souvent soupirer ;
Crainte me dit que ce n’est pas pour moi
Que ainsi te vois par douleur martyrer.
Amour me dit que si et que sa loi
Permet tels cas pour mieux faire la preuve
De ma très ferme et trop leale foi.
Crainte veut bien que un autre ami je trouve
Pour ne mourir en ce cruel tourment.
Amour défend que je fasse amour neuve.
Hélas mon cœur, quel est ton sentement ?
Es tu de lui aimé ? Ou si aimer
Un autre dois ? Dis le moi franchement :
« Aimé ne suis, qui m’est cas trop amer,
Car je le sens, malgré son apparence ;
Ô feint ami que tu es à blâmer !
Aimer ne puis : je n’ai pas la puissance,
Car longtemps a qu’en lui mis mon vouloir
Et en perdis du tout la jouissance. »
Las, cœur qui n’as d’un autre aimer pouvoir
Et d’être aimé as perdu le plaisir,
Tu n’as pas tort de te plaindre et douloir !
Regarde, ami, si tu as le loisir,
S’il est tourment qui soit au mien semblable,
N’ayant nul bien, ni de nul bien désir ?
Je n’ai nul bien, te connaissant muable,
Ni je n’en veux, craignant de rencontrer
Ami de toi moins parfait, variable.
D’aussi parfait l’on ne m’en peut montrer,
quant à beauté, vertu et bonne grâce,
Sur qui n’y ait nul vice à remontrer.
Et qu’un qui fut moindre que toi j’aimasse,
Plus tôt mourrais que de m’y consentir :
Point ne mettrai mon amitié si basse.
Je ne me puis et me veux repentir
De cette amour : fermeté la tient forte,
Mais la douleur la veut anéantir.
Fut-il jamais malheur de telle sorte ?
J’aime un ami qui dit m’aimer, mais quoi ?
Je vois et sais qu’amour est en lui morte.
Laisser le dois, car clairement je vois
Qu’il est menteur ; Mais mon amour honnête
Ne me permet faire ce que je dois.
Et tant que d’œil, bouche, pied, main ou tête
Signe d’amour verrai, rompre ne veux
Cette amitié prise à sa grand requête.
Si fermes sont les liens et les nœuds
Que, si rompus ils sont de son coûté,
Ils sont du mien encor entiers et neufs.
Dames, croyez qu’il m’a bien cher coûté,
Ce faux ami, et coûte et coûtera
Tant qu’à la mort cœur et corps soit boutté.
La seule mort de mon cœur oustera
L’amour de lui, qui sans lui me demeure,
Car autre amour mon cœur ne goustera.
Et, qui pis est, un autre ennui sur l’heure
M’est survenu, qui le premier augmente,
Dont je ne suis pas seule qui en pleure.
Le serviteur de cette vraie amante,
Qui tant longtemps l’a aimée et servie
Qu’el’en était très heureuse et contente,
Enfin a eu de la laisser envie ;
Dont de l’ennui qu’el’en prend et a pris
J’ai bien grand peur qu’el’abrège sa vie.
Il lui a dit, étant d’elle repris
Et bien inquis de sa mutation,
Qu’il est ainsi de mon amour épris.
Moi qui savais sa grande affection
Et devant qui faillir à sa maîtresse
Eût craint de peur de ma correction,
Serais je bien si méchante et traîtresse
Le recevoir, voyant qu’il fait mourir
Par son péché ma compagne en tristesse ?
J’aimerais mieux par mort me voir périr
Qu’en la voyant porter si grand tourment
Je fisse rien pour cette amour nourrir.
En sa faveur je laisse entièrement
Voir et parler où se puisse attacher
L’œil et le cœur d’un si méchant amant.
Je l’aimais tant et le tenais si cher
Quand il l’aimait, comme s’il m’eut aimée,
Mais maintenant ne le veux approcher.
S’amie était digne d’être estimée,
Il devait bien pour jamais s’y tenir,
Et elle aussi d’aimer n’était blâmée.
Dames, celui qui veut mien devenir
Je n’en veux point et son amour me fâche ;
L’autre, que j’aime, je ne puis retenir.
L’un est méchant, trop variable et lâche,
Lequel me suit et toujours je le fuis ;
S’amie et moi avons trop ferme attache !
Celui me fuit que j’aime et que je suis.
Je l’ai perdu et si ne le puis croire.
Hélas jugez en quel travail je suis !
Je n’ai plus rien sinon que la mémoire
Du bien passé qui entretient mon deuil :
Je crois que nul n’a vu pareille histoire.
Or faites donc, madame, le recueil
De mes douleurs que n’ai voulu celer.
Taire me faut ayant la larme à l’œil,
Car les soupirs empêchent le parler. »
Les yeux levés au ciel, crevés de pleurs,
Jetant torrents dont arrosait les fleurs,
Donna silence à sa bouche vermeille,
Car la douleur qui semblait nonpareille
Faisait sa voix par soupirs étouper
Tant qu’il fallut détacher et couper
Ses vêtements pour soulager son cœur,
Ou elle fut crevée de douleur.
Au bout d’un temps que nous l’eûmes tenue
Dessus le pré, elle fut revenue
Et si me dit : « telle est ma maladie
Que qui a pis souffert que moi le dye. »
Lors se coucha près de moi morte et blême,
Les autres deux firent aussi de même,
Car un chacun de leurs doux cœurs sentait
L’ennui trop grand que la tierce portait.
Moi qui d’un mal en vois trois pleurer,
Dis : « vous pourriez jusque au soir demeurer
En ce pleurer que ne pouvez finer,
Et ne sauriez me faire deviner
Qui de vous trois souffre plus de martyre,
Si ne voulez le me dire ou écrire. »
Voyant du lit le soleil approcher,
Vint la seconde ma main prendre et toucher
Et me prier ne m’ennuyer d’attendre
Qu’elle me pût au long son compte rendre.
« Je sens, dit elle,
Cent et cent fois douleur âpre et mortelle
Plus que ne fait, point ne faut que le cèle,
Nulle des deux,
Car le cruel, lequel nommer ne veux
Ami, qui ha d’amour rompu les vœux,
Certes n’est digne
Qu’à lui je parle ou que lui fasse signe,
Ni de plaisir, ni de colère mine.
D’en dire mal,
De l’appeler traître, faux, déloyal
Et plus cruel que nul autre animal,
Ce serait peu
Pour amoindrir de mon courroux le feu.
J’aime bien mieux laisser jouer ce jeu
À la première,
Qui de lui dire injure est coutumière.
Elle lui est ainsi que une lumière
Devant ses yeux.
Son cœur changeant, trop feint et vicieux,
Elle connaît et si lui sied bien mieux
De le blâmer
Que non à moi, car de désestimer
Celui que tant l’on a voulu aimer
N’est pas bien fait.
S’il est méchant, variable, imparfait,
D’elle le vois si très mal satisfait,
Si dédaigné,
Si refusé, déprisé, éloigné,
Qu’il a très mal en ce cas besoigné
D’aller à elle.
Pas ne pensait la trouver si cruelle :
Elle le hait bien fort et ne lui cèle
Ses fâcheux tours.
Elle le fuit en tous lieux et toujours.
Or a il bien maintenant le rebours
De son attente.
Mais de son mal je suis si mal contente
Et en soutiens douleur si véhémente
Que plus n’en puis.
Je suis quasi dessus le bord de l’huis
De désespoir et ne crains profond puits
Ni haute tour
Où volontiers, sans espoir de retour,
Ne me jetasse pour défaire l’amour,
La passion,
Le souvenir, mémoire, affection
Qui de mon mal sont génération
Si importable
Et, qui pis est, si irrémédiable
Qu’à ma douleur n’en est nulle semblable.
Je l’ai aimé
De si bon cœur, tant cru, tant estimé
Que cœur et corps était tout abîmé
En l’amitié
Que lui portais ; Encor ai je pitié
D’ainsi le voir puni et châtié
De son péché.
Hélas, mon Dieu, comment s’est il fâché
De mon amour et ainsi détaché ?
Oncques offense
Je ne lui fis, fors que la résistance
Pour quelque temps, où il fit telle instance
Et si honnête,
Qu’avec honneur je pouvais sa requête
Bien accorder. Et puis, par longue quête,
Par long service,
Par forte amour qui faisait son office,
Gagna mon cœur, voyant le sien sans vice.
Ô la victoire
Dont le vaincu recevait telle gloire
Que le vainqueur ! Hélas, qui eut pu croire
Qu’elle eut duré
Si peu de temps, ni que j’eusse enduré
Si longuement mal si démesuré
Sans souffrir mort ?
Hélas, jugez, mesdames, si son tort
N’est pas égal à l’amour qui trop fort
Mon cœur tourmente,
Et si autant ne suis leale amante
Comme il est faux, donc, si je me lamente,
J’ai bien raison.
En me cuidant tromper par trahison,
Lui même a bu cette amère poison
Qui tant le blesse.
Il est puni par beauté et rudesse,
Mais son ennui n’amoindrit ma tristesse,
Car son cœur lâche
M’ennuie fort et me déplait qu’il fâche
À celle là qui ne peut avoir tache
D’avoir permis
Qu’il la servit : ailleurs son cœur a mis
Lequel ne peut endurer deux amis,
J’en suis bien sûre.
Son déplaisir avec le mien je pleure,
En la cherchant il la fâche à toute heure,
Mais plus à moi
En me laissant, dont suis en tel émoi,
En tel ennui, où nulle fin ne vois,
Qu’à bien grand peine
Se peut penser la douleur qui me meine :
Je me contrains, et ris, et fais la saine,
Et je me meurs !
Ces dames ci qui connaissent mes mœurs
Savent quels maux, faiblesses et douleurs
Je dissimule !
Dont au dedans le double en accumule
Par désespoir qui sans fin me stimule
De me donner
Du tout à lui. Mais peur d’abandonner
Ces deux me vient si très fort étonner
Que mieux veux vivre
En ce tourment, sans en être délivre,
Que leurs deux cœurs à tel ennui je livre.
Pour elles vis,
Et vivre veux du tout à leur devis,
Et pour moi non ; Parquoi il m’est avis
Que pis que morte
Chacun me peut tenir en cette sorte,
Puis que la mort, qui seule me conforte,
Je veux fuir.
C’est tout mon bien, mais je n’en veux jouir
Que leurs deux corps je ne voie enfouir
Avecques moi en noire sépulture.
Nos trois malheurs me feront réjouir
D’être assemblés sous une couverture. »
Lors un dépit et courroux nonpareil
Firent soudain son visage vermeil
Et la douleur sa parole coupa
Tant qu’à peu près elle ne syncopa,
Car par trois fois je la vis défaillir
Sans que des yeux il put larmes saillir.
Le cœur serré jeta si piteux cris
Que à les montrer défaillent mes écrits.
Mais en voyant la tierce que la place
Lui demeurait, me dit de bonne grâce :
« Madame, autant que douleur les tourmente,
Souffrant l’ennui de leurs ingrats amis,
L’amour parfait qui dans mon cœur s’est mis
Fait qu’i n’ont mal qu’ainsi qu’elles ne sente.
Car mon vouloir au leur est si uni
Que, si leurs cœurs ont peine pour aimer
Ceux que l’on peut cruels amis nommer,
Le mien en est comme les leur puni.
Comm’elles j’ai crû leurs amis loyaux,
Lesquels j’aimais comme le propre mien,
Participant en leur plaisir et bien
Comme je veux avoir part en leurs maux.
Si j’ai eu part en leur félicité,
Où si bien fut notre union gardée,
Serait donc bien maintenant retardée
Cette union pour leur nécessité ?
Non ! Mais courir veux aussi vite qu’elles
À leur malheur, sans jamais départir,
Jusques à ce que l’âme pour partir
Aura repris ses ailes immortelles.
Peine, tourment, voire dix mille morts,
Ne me feront peur de m’en tenir près.
Si mort les prend, pourrais je vivre après,
Sentant mourir les deux parts de mon corps ?
Si j’avais mal et les deux eussent bien,
Il suffirait pour me réconforter,
Car leur amour pourrait mon mal ôter :
Contre une, deux ont grand force et moyen !
Si mon ennui perdais pour leur plaisir,
Pour leur ennui perdre je dois aussi
Tout mon plaisir, sans point avoir merci
De cœur, de corps, d’amour ni de désir.
Or je le veux et ainsi le conclus
Puis que je vois leur mal intolérable,
Je veux le mien faire irrémédiable
Et que de moi tout plaisir sait forclus.
Pleines d’ennuis sont, que porter leur faut,
Non pas pour moi, mais contre leur vouloir :
Moi de plaisir, auquel, pour mon devoir,
Hors de mon cœur je fois faire le saut.
Madame, hélas, pensez l’extrémité
Là où je suis ! ayez pitié de moi !
Voyez mon mal, mon trouble, mon émoi,
Voyez amour par amour limité !
L’amour des deux me dit : “ô méchant cœur,
Vous voudriez vous tant à plaisir donner
Et ces dames ainsi abandonner
En leur malheur pour un seul serviteur ?
Las, rirez vous quand elles pleureront ?
Et à plaisir tiendrez les yeux ouverts
quand de douleur verrez les leur couverts
En regrettant leur amour qui se rompt ?
Jouirez vous du voir et du parler
De votre ami par grand éjouissance
quand elles n’ont d’un tel bien jouissance ?
Les laiss’rez vous ? Ne le veuillez celer.”
D’autre côté l’amour du plus loyal,
Du plus parfait qui soit dessus la terre,
Me vient mener une cruelle guerre
En me disant : “pensez au plus grand mal.
Vous savez bien qu’en laissant votre ami,
Duquel si bien avez été servie,
Vous lui ôtez soudainement la vie,
Car son cœur est du vôtre le demi.
Que fera il se voyant séparé
De sa moitié ? Croyez qu’il ne peut vivre.
Sera chacun des cœurs d’elles délivre
De leur ennui, le voyant égaré ?
Si votre mort leur apportait secours
Droit à la mort il vous faudrait courir,
Mais un ami loyal faire mourir
Sans leur servir ? C’est étrange discours.
Las, quel ami est ce que vous laissez ?
Vous n’en savez au monde un plus parfait !
Et nul bien n’ont les deux en ce beau fait,
Fors que leur mal par le vôtre oppressez.”
Voilà comment les deux amours ensemble
Me combattent en grand confusion,
Si m’y faut il mettre conclusion ;
Je la dirai bien que le cœur m’en tremble :
Puis que leur mal est ma mort et leurs vies
Ma vie aussi, si j’ai reçu plaisir
De leurs plaisirs, je n’ai moindre désir
Qu’en leurs malheurs de moi soient suivies.
Or ont perdu, sans savoir bien pourquoi,
Leurs deux amis, soit par faute ou malheur,
Mais moi je perds, sans raison ni couleur,
Celui qui n’a jamais faussé sa foi.
Sa loyauté est vraiment nonpareille ;
Il n’a rien fait qui jamais me déplut ;
Sa grand amour que chacun chercher dut
Je laisse et fuis : n’est ce pas grand merveille ?
Je le tiens tel, si parfait et si bon,
Que je voudrais le mettre en trois parties
Et si serions toutes trois bien parties
quand des deux pars je leur ferais le don.
L’honnête amour de parler et de voir,
Là où l’honneur trouve contentement,
Se peut partir quand volontairement
Le bien on laisse où l’on a tout pouvoir.
J’ai le pouvoir de bien les contenter :
De chaque jour les deux parts je leur donne
Et mon plaisir toutefois n’abandonne,
Car par le leur il pourra augmenter.
Car en sentant de chacune d’eux l’aise,
J’en aurai plus que je n’ai de la mienne
Et mon ami aussi aura la sienne,
Ne faisant rien qui bien fort ne me plaise.
Mon ami seul, qui en vaut plus de trois,
Sera des trois ami. Ô quel lien
Qui quatre cœurs unira sans moyen
En un vouloir ! Hélas, je le voudrais !
Mais j’ai grand peur que pour ces deux folâtres,
Qui sont payés trop d’une larme d’œil,
Veuillent plus tôt ainsi mourir de deuil
Que d’avoir mieux. Tant sont opiniâtres !
Puis qu’elles n’ont cure d’un tel parti,
Mon cœur au leur est uni si très fort
Que, sans avoir regard à peine ou mort,
De mon ami il sera départi.
Las, qu’il est dur ce mot à prononcer !
Laisser ainsi mon bien, mon heur, ma vie !
Hélas, ami, à la mort te convie
Lorsqu’on t’ira cet adieu annoncer.
Que diras tu, ami, de ton amie ?
Ou que l’amour lui a trop cher coûté ?
Ou tu pourras juger d’autre côté
Qu’elle te hait, la nommant ennemie ?
Amour me met en un merveilleux trouble,
Qui d’un côté loue ma fermeté
Et d’autre part défait de sûreté
Le vrai lien qui rendait un, un couple.
Ô que la mort viendrait bien à propos !
Car lui ni moi en ce département
N’aurons jamais qu’à son avènement
Contentement, bien, plaisir ni repos.
Or venez donc et par compassion
Mettez nos corps unis en terre obscure
Avant souffrir qu’au départir j’endure
Si très extrême et dure passion. »
Ainsi parlant, s’appuyant contre un arbre,
En la façon d’une femme de marbre
Qui n’a chaleur, vie ni mouvement,
Les yeux fermés, les dents pareillement,
À ses soupirs défaillait son haleine.
Moi qui la vis en si cruelle peine,
Je pris ses mains à frotter et tenir,
Tant qu’un petit je la fis revenir,
Et, en tournant son œil triste vers nous,
Nous dit : « hélas, que votre ennui est doux
Au pris du mien qui ne peut plus durer ! »
Ce que ne peut la première endurer :
« Vous n’avez mal, dit elle, qu’un tout seul
C’est de laisser pour nous votre plaisir.
Mais j’en ai deux qui aggravent mon deuil :
Las, je n’ai pas seulement le loisir
De regretter de mon ami la perte
Que le second ne me vienne saisir.
Amie, hélas, si ma douleur couverte
Sentiez, qui est fondée en ignorance,
Dont ne m’est point la vérité aperte,
Vous jugeriez n’avoir pas la puissance
De la porter, car el’est par trop griève.
Or Dieu vous gard’ de telle connaissance !
Puis que l’honneur met en votre amour trève,
Plaisir avez, gardant la longue foi
Que nous devez, de la rendre ainsi briève.
Si vous saviez aussi bien comme moi
Que c’est de vivre en doute et en suspens,
Peu votre mal estimeriez, je crois.
S’il me disait : “d’aimer je me repens”,
J’en ôterais mon cœur qui de douleur
Perpétuel en paierait les dépens,
J’estimerais à grand heur ce malheur,
Bien que ce n’est peu de dépit ou honte
D’être laissée ainsi d’un serviteur.
Le déplaisir en est tel et tant monte
Que d’en laisser cent de sa volonté
Ce n’est ennui dont l’on dut tenir compte.
Votre cœur est de désespoir tenté
Pour votre ami : c’est chose raisonnable,
Aussi est il d’honneur bien contenté.
Rendant l’amour de l’union louable
D’entre nous trois, la gloire en recevez,
Qui votre ennui doit rendre tolérable.
Certes le mien, si bien l’apercevez,
Verrez plus grand que le vôtre trois fois,
Si par faveur vous ne vous décevez.
Le moindre ennui, de quoi compte ne fois,
C’est de fuir le plaisir d’être aimée
D’un très honneste et parfait toutefois.
L’autre ennui est que je vois abîmée
En désespoir celle que j’aime tant
Par celui seul dont je suis estimée.
Le tiers ennui trop cruel qui prétend
Me mettre à mort, c’est la doute craintive,
Aimant très fort, de n’être aimée autant.
Que dis je autant ? Mais que l’amour naïve
Soit morte en lui ainsi que je la sens
Dedans mon cœur plus parfaite et plus vive.
Ces trois ennuis me mettent hors du sens
Et si ne vois moyen de m’en défaire
Sinon mourir, à quoi je me consens.
Il n’est ennui, qui tant de mal sût faire,
S’il est connu, qu’on ne trouve moyen
Pour quelque peu au moins y satisfaire.
Mais mon mal est incapable de bien,
Car je le sens et n’ai nulle assurance
Si mon ami tient ou rompt ce lien.
Si juger veux par très sûre apparence,
Je dis qu’il est rompu, mais son jurer
Me vient donner du contraire espérance.
Las, mon ennui est pour longtemps durer,
Car le suspens de la conclusion
Qu’il fait d’aimer me contraint d’endurer.
Son doux parler m’est une illusion
Qui m’aveugle sens et entendement
Et de l’aimer me donne occasion.
Hélas, ses faits parlent bien autrement :
Par eux je vois que de lui suis laissée.
Il dit que non ; Vérité dit qu’il ment.
Par ses effets ma joie est rabaissée,
Par son parler elle se ressuscite ;
Ainsi des deux sans cesser suis pressée.
Si grand douleur grande pitié incite,
Plus que de vous ayez compassion
De mon malheur, qui à la mort me cite.
Celle qui n’a rien qu’une passion
Dont la cause est connue et bien certaine,
Ô qu’el’est près de consolation !
De si et non j’ai la tête si pleine
Que, si le pis des deux pouvait savoir,
Je le tiendrais à grâce souveraine.
Mais le suspens surmonte mon pouvoir. »
Comment, comment ?
Soutenez vous être plus grand tourment
Douter l’oui ou non de votre amant »
Dit la seconde,
« Que de savoir par épreuve et par sonde
Que changement au plus parfond abonde
De son faux cœur ?
Estimez vous souppeçon, doute et peur
Comme un savoir certain sans nul erreur ?
C’est cas étrange !
Mais moi qui sais de mon ami le change,
Que je tenais aussi parfait qu’un ange,
Que puis je faire ?
Il le m’a dit sans point se contrefaire
Qu’il se voulait de mon amour défaire
Pour la remettre
Du tout en vous, ce que jamais permettre
N’avez voulu, mais bien vous entremettre,
Par la pitié
Qu’aviez de moi, rhabiller l’amitié
Dont je retiens moi seule la moitié.
Si vous avez
Peine à fuir ce qu’aimer ne devez,
Que dois je avoir sinon les yeux crevés
De lamenter
Celui qui tant me soulait contenter,
Qui ne me veut plus aimer ni hanter.
Las, je le perds
Qui fut tout mien et à beaux yeux ouverts
Le vois fuir, non pas par les déserts
Ni lieu sauvage,
Mais droit à vous ; Et devant mon visage
Il a tourné son saint pèlerinage.
Il aurait bien
Changé en mieux, s’il ne savait combien
Nous nous aimons et que ce qui est mien
Est vôtre aussi.
Il fuit de moi, cherchant de vous merci ;
Pour votre non, il perd de moi le si.
Ô cruauté !
En mon endroit par sa déloyauté
Et dans son cœur par votre grand beauté !
Car un seul compte
Vous n’en tenez. Ô mon Dieu ! Quelle honte
Il doit avoir et peur que je raconte
À vous, amie,
Et vous à moi le discours de sa vie.
Car entre nous sa trop fausse alchimie
Est découverte,
Dont à moi seule en demeure la perte.
Vous ne savez si elle est mûre ou verte
Cette douleur.
Plus il vous dit sa peine et son malheur,
Plus vous moquez de son mal et couleur
Point n’en changez.
Et puis de lui si fort vous étrangez
Que je vois bien que mon tort vous vengez
Tout en riant.
Et je m’en vois à part pleurant, criant,
Et Dieu et saints requérant et priant
Pour mon aide.
Car je n’y vois sans miracle remède.
Je l’ai perdu et n’y a croix ne guide
Qui radresser
Le sut vers moi. Je ne le veux presser
Et si ne puis son amour délaisser,
Qui est plantée
Dedans mon cœur et si très fort entée
Que, bien qu’il m’ait du tout mal contentée,
Je n’ai vigueur,
Force ou pouvoir de l’ôter de mon cœur,
Qui est nourri et plein de sa liqueur
Et transmué
En cet amour tant que, s’il n’est tué,
Il n’en sera séparé ni mué.
Or donc pensez
Quel votre ennui est que vous avancez
Plus que le mien : en quoi vous m’offensez.
Le pis de vous
C’est le douter. Las, qu’il me serait doux !
Je jugerais mon ami tous les coups
Avoir le droit.
Ce souppeçon pour un temps me vaudrait
Et contre non, oui me soutiendrait.
Mais de ce non
Certaine suis, non point par faux renom.
Car toutes trois pour méchant le tenons,
Pour variable,
Traître et menteur et moi pour immuable
En fermeté honorable et louable.
Qui me contraint
Qu’autant de temps qu’en amour juste et saint
Je l’ai porté dedans mon cœur empreint
Par amour forte,
Autant de temps pour méchant je le porte.
Impossible est que jamais il en sorte.
Sa lâcheté
Donnera feuille à ma grand fermeté.
Ô que l’honneur sera cher acheté
De ne partir
Hors de l’amour dont le vois départir !
Où est l’esprit comme le mien martyr ?
Il n’en est point.
Loyauté l’a si fort en moi conjoint
Que mon cœur sien n’est plus mien ; C’est le point.
Et si mourir
Me faut sans cœur, à la mort puis courir,
Car, arrachant celui qui peut nourrir
En lui la vie,
De lui bientôt elle serait ravie.
Las, j’aurais bien de cette mort envie !
Mais lui en moi
Vivre me fait en tel deuil et émoi
Qu’il me faisait vivre d’amour et foi
En grand plaisir,
Durant le temps que par heureux loisir
Me racontait son honnête désir.
Or est passé
Tout ce beau temps où je n’ai amassé
Rien que regret et espoir que son tort
M’apportera, bien connu par ma mort,
De tous amants : requiescat in pace. »
La tierce, oyant leur gracieux débat,
Plus par ennui que par plaisant ébat,
Dit : « je vous pri’et requiers toutes deux
N’estimer tant, l’une sa peur et doute,
L’autre son deuil, qu’un peu l’on ne m’écoute,
Puis que pour vous de bon cœur souffrir veux.
Vos maux sont grands, nulle doute n’en fois,
Vivre en suspens, sans résolution,
Par l’ami plein de toute fiction.
Mais le mien n’est pas moindre toutefois.
Car mon ami, loyal et véritable,
Où j’ai trouvé tout ce que je désire,
Me faut laisser pour me faire, en martyre
Et en malheur, à vous autres semblable.
Las, si en lui savait rien d’imparfait
Ou qu’envers moi en quelque cas eût tort,
Notre lien, qui en serait moins fort,
Sans grand douleur plus tôt serait défait.
Mais il n’y a occasion aucune
Entre nous deux, qui double mon tourment,
D’ainsi laisser un si parfait amant
Pour recevoir part en votre infortune.
S’il ne m’aimait, il me serait aisé
De le laisser, ou bien si en doutance
J’étais de lui par sa grand’ inconstance,
Mon deuil serait doucement apaisé.
Hélas, il n’a rien d’imperfection,
Car son corps est parfait, son cœur sans vice,
En tout honneur m’a fait loyal service,
Las, dure en est la séparation !
Laisser celui de qui ne suis aimée,
Qui ne le vaut, qui est feint ou méchant
Ou qui de nous la honte va cherchant,
Je n’en pourrais être mal estimée.
Mais d’un parfait qui m’aime tant, hélas,
Le départir m’en est trop importable,
Car son amour demeurera perdurable
Dedans mon cœur qui de l’aimer n’est las.
Je perds de lui la parole et la vue
Et tout le bien dont je soulais jouir,
Et ne retiens riens pour me réjouir
Que son amour, dont je suis bien pourvue.
C’est bien raison qu’après le congé pris,
Que dis je pris ? Mais donné sans sa faute,
Sa grand amour, tant vertueuse et haute,
Se mette ailleurs, ja n’en sera repris.
Mais cette là que j’ai par lui conçue
Me demeurera pour douce nourriture ;
Dedans mon cœur, de tant ferme nature,
Nulle autre amour ne sera plus reçue.
Vous deux perdez l’amour de vos amis,
Mais d’eux avez la parole et la vue,
Moi j’ai l’amour très certaine et connue,
Mais tout plaisir pour vous j’ai dehors mis.
Car le parler et la vue je quitte.
C’est tout mon bien que pour vous j’abandonne,
Ô quel trésor, amies, je vous donne !
Faut il qu’amour ainsi vers vous m’acquitte ?
L’on tient qu’il n’est nul plus cruel martyre
Que pour son dieu, d’un propos volontaire,
Fuir plaisir et, en lieu solitaire,
Soi séparer du bien que l’on désire.
Car le martyr, souffrant cruel tourment
Par main d’autrui, met toute sa science
De soutenir son mal par patience,
Qui de tous maux est le soulagement.
Vous endurez, par le tort et le vice
De vos amis, en dépit de vos cœurs,
Pis que la mort. Ô petites douleurs
Mises auprès de mon grand sacrifice !
Pour vous aimer, celui où je me fie
Trop plus qu’à moi, que j’aime, que j’estime,
Mon bien, mon heur, j’en fais une victime
Et volontiers pour vous le sacrifie.
Non pas que mort le veuille présenter,
Mais tout vivant, qui m’est plus grand regret,
Sans retenir un seul bien en secret,
Ni d’un seul mal me vouloir exempter.
Avecques lui tout plaisir je renonce
De voir, d’ouïr, de penser, de parler,
Parquoi d’ennui, point ne le faut celer,
J’en ai le marc si vous en avez l’once.
Sa grand bonté et sa perfection
Entretiendront en moi cette amour forte
Qui n’aura fin tant que je soie morte,
En ce point seul j’ai consolation.
Car d’espérer jamais plus le ravoir,
L’ayant laissé, ce serait grand folie :
Ou il mourra par grand mélancolie,
Ou il fera d’aimer ailleurs devoir.
Las, s’il en meurt, je perds mon espérance,
S’il aime ailleurs, plus à moi ne viendra
Car où l’amour le liera se tiendra ;
Je connais bien sa grand persévérance.
Mort ou aimant je le perds sans espoir
De le ravoir ; Ma perte est toute entière.
Mais vous avez, dames, d’espoir matière,
Ce que je veux bien clair vous faire voir.
Si l’une voit les effets accorder
De son ami avecques sa parole,
Je ne la tiens si sotte ni si folle
Qu’elle voulut ses fautes recorder.
À l’autre aussi l’ami qui s’en viendrait
Lui demander en grande repentance
Pardon, en lieu de dure pénitence
Plus de ses maux il ne lui souviendrait.
Or tous ces biens vous peuvent advenir,
Car vous n’avez pas élu votre peine.
Mais moi je suis de ma perte certaine
Sans nul espoir qu’il puisse revenir.
Que perdez vous ? Un mauvais et un feint,
Et moi un bon, sans vice ni sans feinte,
Lequel perdant d’aimer je suis contrainte,
Laissant le bien que perdre j’ai tant craint.
Fortune ou Dieu ce bien ici ne m’ouste,
C’est moi sans plus qui de mon cœur l’arrache
Afin que mieux unie je m’attache
À vos malheurs. Ô que cher il me couste !
Brief, vos espoirs et ma désespérance,
Les méchants tours de vos cruels amis,
Et les vertus que Dieu au mien a mis
Font de vos maux au mien la différence. »
Plus tôt le jour nous eût pu défaillir
Que ces dames de leurs propos saillir,
Qui me semblait être à recommencer.
Mais, regardant la nuit trop s’avancer,
Contrainte fus d’empêcher le discours
De leurs propos, que je trouvais trop courts,
Car je n’ouï oncques femmes mieux dire,
Pour sentir tant qu’elles d’ennui et d’ire.
Et si le lieu où fallait retourner
Eût été près, volontiers séjourner
L’on nous eût vu jusques au lendemain,
Passant la nuit à ce doux air serein.
Celles en qui serein, travail, sommeil
N’était senti, et du très clair soleil
L’absence était de leurs yeux inconnue
Et de la nuit la soudaine venue,
Connurent bien, écoutant ma raison,
Que du partir était heure et saison,
Qui leur déplut, car chacune n’avait
De son ennui dit ce qu’elle savait.
Parquoi en pleurs voulurent révéler
Ce que le temps les contraignait celer,
Et de larmes et soupirs firent langues
Pour achever sans parler leurs harangues.
Las, ce pleurer me montra le tourment
Dont ne savais que le commencement :
Par leur parler les larmes confirmèrent
Quel fut l’ennui de celles qui aimèrent.
Je ne crois pas que perdre père et mère
Sut engendrer passion plus amère
Que je leur vis porter et soutenir.
Mais sur le point de nous en revenir
Prirent leurs cris et pleurs à redoubler,
Tant que soudain firent le ciel troubler
Qui d’elles prit telle compassion
Que sa douceur par grand mutation
Se convertit en tonnerre et tempête,
En pluie et vent tant qu’aux champs n’y eut bête
Qui ne cherchât caverne ou couverture
Pour se cacher, voyant telle aventure.
En essuyant leurs yeux et leurs visages
Toutes les trois, tant honnêtes et sages,
D’abandonner ce pré furent contraintes,
Laissant au ciel achever leurs complaintes.
La pluie en crût, lors chacune décoche
Et nous mîmes toutes quatre en la coche
Qui attendait notre département ;
Après les autres courûmes vitement.
Mais en allant, pour ôter le discord
De leurs propos et les mettre d’accord,
Je leur requis vouloir un juge prendre
Qui leurs débats voulût et pût entendre.
Car aussitôt que l’une j’écoutais
De son côté soudain je me mettais ;
Et puis, quand l’autre avait compté son cas,
À qui ne faut bailler nuls avocats,
Je me rendais à son opinion.
Pour les tenir donc en union
Un bon esprit leur était nécessaire,
Et quand à moi, je m’obligeais de faire
Tout mon pouvoir, que je sens trop petit,
Pour réciter, non à mon appétit,
Tous leurs propos, mais au moins ma puissance
N’épargnerai à donner connaissance
De leurs ennuis comme leur ai promis,
Sans qu’un seul mot de leurs dits soit omis.
« Notre débat, ce me dit la première,
Met notre esprit en tell’obscurité
Qu’il ne nous faut pas petite lumière.
Je n’en sais qu’un qui, à la vérité,
Puisse juger qui plus a de douleur
Et plus d’honneur par souffrir mérité.
C’est celui seul duquel la grand valeur
N’a son pareil et à tous est exemple
Des grands vertus par qui s’acquiert honneur.
C’est lui qui peut triompher en son temple,
ayant passé par celui de vertu.
C’est lui que ciel, et terre, et mer contemple.
La terre a joie, le voyant revêtu
D’une beauté qui n’a point de semblable,
Au prix duquel tous beaux sont un fétu.
La mer, devant son pouvoir redoutable,
douce se rend, connaissant sa bonté,
Et est pour lui contre tous favorable.
Le ciel s’abaisse et, par amour dompté,
Vient admirer et voir le personnage
Dont on lui a tant de vertus compté.
C’est lui lequel tout le divin lignage
Des dieux très haut ont jugé qu’il doit être
Monarque ou plus si se peut davantage.
C’est lui qui a grâce et parler de maître
Digne d’avoir sur tous gloire et puissance,
Qui sans nommer assez se peut connaître.
C’est lui qui a de tout la connaissance
Et un savoir qui n’a point de pareil,
Et n’y a rien dont il ait ignorance.
De sa beauté il est blanc et vermeil,
Les cheveux bruns, de grande et belle taille ;
En terre il est comme au ciel le soleil ;
Hardi, vaillant, sage et preux en bataille,
Fort et puissant, qui ne peut avoir peur
Que prince nul, tant soit il grand, l’assaille.
Il est bénin, doux, humble en sa grandeur,
Fort et constant et plein de patience,
Soit en prison, en tristesse ou malheur.
Il a de Dieu la parfaite science
Que doit avoir un roi tout plein de foi,
Bon jugement et bonne conscience.
De son dieu garde et l’honneur et la loi,
À ses sujets doux support et justice.
Brief lui seul est bien digne d’être roi.
Si, pour l’enfant éteint par trop grand vice,
À Salomon demandèrent les femmes
Le jugement, par son royal office,
Nous ne pouvons encourir aucuns blâmes
Quand à ce roi, plus grand que Salomon,
Présenterons la douleur de nos âmes
Et, s’il lui plaît lire ce long sermon,
Il jugera qui soutient la plus grande,
Aussi l’amour dont point ne nous blâmons.
Dames, le roi pour juge je demande,
Qui jugera à notre affection
L’honneur, aussi à notre fiction
Punition par honorable amende. »
Quand je la vis choisir si hautement,
Crainte me prit en lui disant : « vraiment,
Si devant l’œil d’un si parfait esprit
Fallait montrer mon trop mal fait écrit,
Vous pourriez bien prendre ailleurs secrétaire.
J’aimerais mieux me dédire et me taire,
Car d’empêcher sa vue et son bon sens
Sur mes beaux faits, jamais ne m’y consens.
Les plus parfaits où n’y a que remordre
Liment leurs faits et les mettent en ordre
Premier que oser, sans bien les accoutrer,
Devant tel roi si savant les montrer,
En craignant plus de lui le jugement
Que du surplus de tout le firmament.
Moi donc qui suis des écrivains la moindre
Et moins que rien, ne dois je pas bien craindre
vos bons propos bien dignes d’être vus
Rendre par moi indignes d’être lus
Devant le roi, où ne faut présenter
Rien qui son sens ne puisse contenter ?
Plus le louez, plus de crainte me prend.
Car c’est celui de qui chacun apprend,
Qui sait louer le bien en vérité
Et rendre au mal ce qu’il a mérité.
Or choisissez un juge tel que moi,
Car, s’il fallait montrer devant le roi
Un si très bas et mal tissu ouvrage,
Je n’aurais pas d’écrire le courage. »
« Le roi vraiment,
Dit l’autre après, j’eusse élu justement,
Car qui est plus que lui parfait amant ?
Ne qui entend
Mieux qu’il ne fait où vraie amour prétend ?
Il a aimé si fort, si bien et tant
Qu’il peut entendre
Ce qui en est et la raison en rendre
Par son bon sens, qui à tous peut apprendre.
L’amour loyal,
Ferme et parfait dedans son cœur royal
A fait son trône et son haut tribunal
Pour juger tous
Les vrais amants, sages, hardis et doux,
Et se moquer des glorieux et fous
Qui font les braves,
Outrecuidez, pensant faire les graves,
Puis refusez, bien sots, font les esclaves.
Car c’est le rôle
Qu’il faut jouer où défaut la parole
Et le bon sens. Et quelque pauvre folle
Ou les craindra
En braves gens, ou pour morts les tiendra,
Ne parlant plus, ce que point n’adviendra
À une sage
Qui prend plaisir d’ouïr un bon langage
Dit d’un bon cœur vertueux, d’un visage
Plein d’une audace,
D’une douceur et d’une bonne grâce
Qui plaît toujours à chacun quoi qu’il fasse.
Celui aura
Du roi l’honneur : bien choisir le saura.
Par lui chacun bien recevoir pourra
Juste sentence.
Lui seul connaît l’être et la subsistance
D’amour, le bien, aussi la pénitence
Qu’il peut donner.
Combien qu’il soit roi et puisse ordonner,
Son cœur humain n’a craint d’abandonner
L’autorité
De commander contre la charité :
Il aime mieux souffrir l’austérité,
La passion
Que donne à tous le dieu d’affection,
Et, comme étant d’autre condition,
Veut s’asservir
Par ferme amour, par sûr et long servir,
Et par vertus, des dames desservir
Bon traitement,
En déprisant force et commandement.
Si lui plaisait, il ferait autrement.
Mais son haut cœur
A joint l’amour, la vertu et l’honneur,
Qui l’a rendu de cruauté vainqueur.
Parquoi la palme,
Louange et gloire, et renommée et fame
Lui doit d’amour tout homme et toute femme.
Puis que lui seul
Vous n’acceptez pour juge, dont j’ai deuil,
Vous qui avez fait ce piteux recueil
De notre histoire,
Vous en avez mieux qu’un autre mémoire
Et n’êtes pas sans quelque expérience
Que c’est d’amour, je vous en veux bien croire,
Or jugez nous en bonne conscience. »
« Je ne veux point de mon sens abuser,
Mesdames, dis je, ains très bien m’excuser
Que je ne suis pour juger suffisante
Et aussi peu à écrire duisante
Votre débat, mais désir de savoir
Tous vos ennuis, ignorant mon pouvoir,
Me fit soudain, sans y penser, promettre
De les écrire et dans un livre mettre.
Ma foi promise, aussi votre prière
Mirent ma peur et ma raison derrière.
Cette première et trop folle entreprise
Veux mettre à fin, mais, si vous plaît, reprise
Je ne serai de la seconde erreur,
Qui dois avoir de la première horreur.
Mes cinquante ans, ma vertu affaiblie,
Le temps passé commandent que j’oublie,
Pour mieux penser à la prochaine mort,
Sans avoir plus mémoire ni remord
Si en amour a douleur ou plaisir.
Donc veuillez autre juge choisir
Qui justement vous puisse satisfaire.
Je ne le puis ni ne le saurais faire. »
La tierce dit : « dames, voici pitié
quand celui seul nous ne pouvons avoir
Qui est l’abîme et source de savoir
Et qui connaît la parfaite amitié.
Sûre je suis que, plus tôt présenté
N’eût à ses yeux ce livre pour le lire,
Que tout soudain ne nous eût bien su dire
Qui a le cœur de douleur plus tenté.
Son œil défait toute feintise et ruse,
Son sens entend la fin de tous propous,
Et son cœur sent mieux qu’en touchant le pouls
Qui aime ou non. Brief, nully ne l’abuse.
Si nous perdons de lui le jugement
Et de sa sœur, qui de lui doit tenir
Et ses propos vertueux retenir,
Un autre j’ai en mon entendement.
C’est cette là qui n’a gloire petite
De notre temps, mais la plus estimée
Est et la plus parfaitement aimée,
Ce que très bien par ses vertus mérite.
Si par beauté se connaissent les femmes,
Allez où sont dames et damoiselles,
Comme un soleil au milieu des étoiles
Vous la verrez parmi toutes les dames.
Si par vertu son nom se doit connaître,
Voyez ses faits, qui ne sont point cachés,
Tous pleins d’honneur, de nul vice tachés,
Vous la verrez dessus toutes paraître.
De ses bienfaits chacun lui rend louange,
Ils sont connus de tous les gens de bien ;
Pour ses amis elle n’épargne rien
Et des méchants ennemis ne se venge.
Si on connait le nom par la fortune
De biens, d’honneur, de richesse et faveur,
Voyez qui ha de son maître et seigneur
Ce qui lui plaît sans lui être importune.
Mais tous les biens qu’elle en peut recevoir
Ne lui sont riens, car seulement heureuse
Se tient de voir par amour vertueuse
Tenir les cœurs unis comme on peut voir
Les cœurs du plus parfait et plus parfaite
Que l’on peut voir, en qui Dieu et nature
N’ont rien omis de ce que créature,
Pour acquérir perfection, souhaite.
Acceptez donc madame la duchesse
Qui en vertus et honneur passera
La plus parfaite qui soit ne qui sera
Ne qui fut onc. À elle je m’adresse.
Elle connaît que c’est de bien aimer :
Le vrai amant la tient à son école,
On le peut bien connaître à sa parole
Qui tant se doit priser et estimer.
Quand elle aura vu notre doux combat,
Sûre je suis que, sans favoriser
L’une partie et l’autre dépriser,
Fera la paix de notre long débat. »
Toutes, voyant sa bonne élection,
À la duchesse où gît perfection
Le jugement ont remis de leur fait.
Et moi, voyant que juge plus parfait
L’on ne pourrait en ce monde trouver,
Leur bon avis voulut bien approuver,
En leur disant : « possible n’est de mieux,
Dames, choisir pour moi dessous les cieux.
Par son bon sens de justice usera
Et sa douceur ma faute excusera.
Et s’il advient, et que bon il lui semble
Que le propos et l’écriture ensemble
Devant le roi puisse être découvert,
Sûre je suis qu’ayant le livre ouvert
Regardera les points où le lecteur
Se doit montrer avocat de l’acteur
Et, en louant vos entreprises hautes,
Excusera mes ignorantes fautes
Et servira de douce couverture
Sa grand bonté à ma pauvre écriture.
Et si pouvez croire que sa sentence
Telle sera comme le roi la pense.
Ainsi pourrez par ce très sûr refuge
Avoir le roi, que désirez, pour juge,
Qui, sans refus, d’un cœur doux et humain,
Regardera, venant de telle main,
Tout ce discours qui est digne de lui
Et l’écriture aura pour son appui
Celle qui peut la défendre de blâme
Et l’excuser comme une œuvre de femme.
Ainsi pourra couvrir sa charité,
Devant les yeux de la sévérité
Du roi, qui fait à tous jugement droit,
Ce que j’ai trop failli en chaque endroit. »
Lors d’un accord sur le point nous trouvâmes
Que dans la coche au logis arrivâmes.
La nuit me fit aux trois donner l’adieu,
Non pour dormir, mais pour trouver un lieu
Où, sans avoir de nul empêchement,
Pusse acquitter ma promesse et serment.
Mais, en voyant du propos la grandeur,
De mon langage et termes la laideur,
Honte me fait finer ma mauvaise œuvre.
Mais vérité veut que je la descoeuvre
À celle là que je prends pour aide,
Pour mon secours et souverain remède
C’est donc à vous, ma cousine et maîtresse,
Que mon labeur et mon honneur j’adresse,
Vous requérant, comme amie parfaite,
Que vous teniez cette œuvre par moi faite
Ainsi que vôtre et ainsi en usez
Et la montrez, celez ou excusez.
Faites au roi entendre la substance
Pour à ces trois donner juste sentence.
Votre parler lui fera mieux savoir
Tout le discours que de lui faire voir
Ce livre auquel mon écriture efface
Tout le plus beau et la meilleure grâce
De leurs propos, desquels j’ai bien suivi
La vérité, mais la grâce et la vie
Qui est dedans, je l’ai toute souillée
De fâcheux mots, empêchée et brouillée
Tant que je dois, en lieu d’augmenter, craindre
La grand valeur du propos faire moindre.
Quand est de vous, honteuse je ne suis
De vous montrer le mieux que faire puis.
S’il y a rien digne de moquerie,
Moquez-vous en, point n’en serai marrie,
Car sûre suis qu’à un second ni tiers
Ne montrerez ma faute volontiers
Fors à celui qui sur tous a pouvoir,
Envers lequel vous ferez tout devoir
De m’excuser, j’en suis bien assurée.
Car cette amour, en nos cœurs emmurée,
Soit de montrer ce livre ou le cacher
Fera si bien qu’on ne pourra toucher
À mon honneur qu’entre vos mains je mets,
Comme à la dame en qui, je vous promets,
J’ai mis cœur, corps, amour, entendement
Où ne verrez jamais nul changement.
Parlant de moi, oublier je ne dois
Celles de qui la douleur, je le crois,
Mérite bien que vous veuillez entendre
Leurs passions, car elles veulent tendre
À qui aura de bien aimer l’honneur
Et d’avoir plus dans le cœur de douleur.
Ou cette-là qui en suspens demeure
Pour un ami, chassant l’autre à toute heure ;
Ou cette-là de l’ami délaissée
Qui de regret importable est pressée ;
Ou l’autre qui laisse un ami parfait
Pour ressembler, et en dit et en fait,
Aux autres deux et l’union tenir
Où ferme amour leurs trois cœurs fait unir.
Et cette-là se tiendra bienheureuse
Que vous direz des trois plus douloureuse,
Et son malheur à très grand bien tiendra,
Quand sur les deux votre arrêt obtiendra
De plus avoir qu’elles d’âpre douleur,
Ennui, tourment, désespoir et malheur.
Les deux aussi, quand jugées seront
De votre main, bien s’en contenteront.
Et je serai trop plus qu’elles contente
Si mon labeur, lequel je vous présente,
Vous donne autant, en lisant, de plaisir
Qu’en l’écrivant j’en ai eu de désir.
Or le prenez et pensez qu’il procède
De qui le lieu à nulle autre ne cède
De vous aimer et, attendant le bien
Que Dieu un jour me donne le moyen
De vous montrer par effet ma pensée,
Je lui requiers qu’ainsi que commencée
Il a en vous fortune si très bonne,
Que maintenant et pour jamais vous donne
Autant de bien, d’honneur et de santé
Comme il en faut, pour être contenté,
À votre cœur plein d’amour et de foi,
Et tout autant que j’en désire au Roi.
• Plus vous que moy. •
